Gapu kadagiti saludsod maipapan iti bilang ti puesto ti party-list, kiniddaw ti Commission on Elections (Comelec) kadagiti maseknan a partido a mangidatagda iti pormal a position paper sakbay a mairingpas ti pannakaibunong ti puesto ken pannakaipakaammo dagiti nangabak a grupo iti 2025 midterm election.
Iti session ti National Board of Canvassers (NBOC) a naangay idi Mayo 15, nangidatag ni Atty. Karlo Domondon (PhilRECA Party-list) iti motion ken manifestation mainaig iti naideklarar a bilang ti puesto dagiti party-list.
Segun ken ni Domondon, maikontra iti damo nga imbaga ni Comelec Chairman George Erwin Garcia nga adda 63 a puesto ti pagbibingayan ti party-list, idinto a 64 ti rumbeng a bilang daytoy. Insingasing ni Domondon a maresolbar koma pay daytoy a banag sakbay a malpas ti panagbilang.
Pinadayawan ni Garcia ti mosion ni Domondon ket inawisna amin a party-list representative, abogado, ken legal counsel a mangidatagda iti pormal a position paper a mangtaming kadagiti kangrunaan a saludsod mainaig iti panangilatang iti puesto ti party-list.
Pimmatay iti 2 a polis iti Bulacan, natay a nakipinnaltog iti Cagayan
Kinuna ni Garcia a babaen dagitoy a position paper, saandan kasapulan ti oral argumentation.
Ti party-list system ket mailatang iti 20 porsiento ti dagup a puesto ti Kamara. Ti bilang ti puesto a maala ti tunggal grupo ket naibatay iti bilang dagiti botosda, kas mayannurot iti pormula a binukel ti linteg ken pangngeddeng ti Korte Suprema.
Naikeddeng ti pinal a proklamasion dagiti nangabak a party-list inton Lunes, Mayo 19, bayat a resolbarenda ti parikut. (Dhel Nazario/Manila Bulletin//Lito Hilidon/Bannawag)
