Naglusulos pay laeng ti chief prosecutor ti International Criminal Court (ICC) a ni Karim Khan bayat nga urayenna ti resulta ti pannakaimbestigar ti maipagarup a seksual a pananabuso a reklamo kenkuana, kas impakaammo ti ICC idi Mayo 15.
Segun ken ni Khan, saan a pudno ti ipabpabasolda a ginandatna a piliten ti katulonganna a babai iti maysa a seksual a relasion ken mapapati a kinarawana uray di kayat ti babai.
Iti panagimbestigar ti The Associated Press idi napan a tawen, natakuatanda nga indatag ti dua nga empleado ti korte, a nangipulongan ti biktima, daytoy a pasamak iti independent watchdog ti ICC idi Mayo ti napan a tawen, sumagmamano a lawas kalpasan a maala ni Khan ti arrest warrant da Israeli Prime Minister Benyamin Netanyahu, ti defense minister-na, ken ti tallo a daulo ti Hamas gapu iti kaso a war crimes.
Kinuna ti watchdog nga inenterbiuda ti biktima ket lineppasda ti imbestigasionda kalpasan ti lima nga aldaw ta saan a kayat ti babai ti mangipila iti pormal a reklamo.
'Supermajority': Kaaduan a nangabak a kongresman, suportadoda ni Romualdez
Nupay awan ti masarakan ti watchdog nga inaramid ni Khan, dinagadagda ni Khan a liklikanna ti babai tapno masalakniban ti kalintegan dagiti maseknan ken ti kinasin-aw ti korte.
Iti statement ti ICC idi Mayo 15, kinunana nga impakaammo ni Khan ti pangngeddengna nga aglusulos pay laeng agingga a malpas ti imbestigasion nga isayangkat ti Office of Internal Oversight Services, ti U.N. internal watchdog.
Ti deputy prosecutors ti ICC ti mangimaton iti opisina ti prosecutor bayat ti kaawan ni Khan. (Associated Press/Manila Bulletin//Lito Hilidon/Bannawag)
