Pinasingkedan ni Papa Leo XIV idi Biernes, Mayo 16, a ti pamilia ket naibatay iti “natalged a panagdenna ti maysa a lalaki ken maysa a babai,” ken dagiti di pay naipasngay ken nataengan ket naparaburanda iti dignidad kas pinarsua ti Dios, nga inlawlawagna ti natarus a Katoliko a sursuro maipapan iti panagasawa ken aborsion iti rugi ti kinapapana.
Kiniddaw met ni Leo, ti kaunaan nga Amerikano a papa, ti pannakaisubli manen ti multilateral a diplomasia ken pannakaitandudo ti panagsasarita iti nagbaetan dagiti relihion para iti pannakagun-od ti kappia, iti umuna a pannakitaripnongna iti diplomatic corps ti Vatican. Pribado ti taripnong, ngem inruar ti Vatican ti naisagana a teksto ni Leo ken ti dekano ti diplomatic corps.
Maysa kadagiti protocol requirement ti pannakitaripnong kalpasan ti conclave, a mangipalubos iti baro a papa a mangkablaaw kadagiti pannakabagi dagiti gobierno ti lubong sakbay ti pormal a Misa para iti instolasionna a kas papa inton Domingo, Mayo 18. Maysa a soberano nga estado ti Holy See wenno Vatican iti babaen ti international law, addaan iti diplomatiko a relasion kadagiti nasurok a 180 a pagilian ken addaan observer status iti United Nations.
Sipipinget a pinatalgedan idi ni Papa Francis ti kangrunaan a Katoliko a sursuro a mangbusor iti aborsion ken euthanasia, a kunana a pammaneknek dagitoy iti “throwaway culture” iti agdama. Ngem pinagbalinna met a kas pakabigbigan ti panangdanon kadagiti LGBTQ+ a Katoliko, nga ingganetgetna a maawatda iti simbaan. Dina pulos binalbaliwan ti doktrina ti Simmbaan a maipapan iti panagasawa a kas panagdenna ti lalaki ken babai, a dagiti homoseksual nga aramid kas “saan nainkasigudan a naurnos.”
Papa Leo XIV, nagbuya iti 'Conclave' sakbay ti rugi ti pudpudno a conclave iti Vatican
Kas daulo idi ti Augustinian order, binabalaw ni Rev. Robert Prevost idi 2012 ti “homoseksual nga estilo ti panagbiag” ken ti akem ti mass media iti panangitandudo iti panangawat iti relasion ti agpada a sekso a maikontra iti Katoliko a doktrina. Maysa a dekada kalpasanna, bayat ti kinapapa ni Francis, binigbig ni Prevost ti awag ni Francis para iti ad-adda nga inklusibo a Simbaan, ket kinunana a dina kayat a mailaksid dagiti tattao maibatay laeng iti estilo ti panagbiagda. (Associate Press)
