Segun iti maysa a nangato ti saadna a kongresman, itoy a kasapa, naalan ni Leyte 1st district Rep. Martin Romualdez ti suporta ti kaaduan kadagiti kapangpangabakda a kameng ti Kamara dagiti Pannakabagi iti umay a maika-20 a Kongreso, isu a nakananaman ni Romualdez nga isu manen ti mapili nga Speaker sakbay pay a mangrugi ti panagpili manen iti baro nga Speaker.
“Nalpasen. Bagin ti Speaker ti bilang,” kinuna ni Quezon 2nd district Rep. David "Jay-Jay" Suarez, a ti dakdakamatenna ket ni Romualdez, Speaker ti agdama a maika-19 a Kongreso.
Agikkat ni Romualdez, presidente ti dominante a Lakas-Christian Muslim Democrats (Lakas-CMD), a kas Speaker inton ag-adjourn ti Kongreso inton Hunio 13. Ket segun ken ni Suarez, nakasiguradon ti maikadua nga Speakership ni Romualdez.
Agarup 240 wenno nasurok a dua a kakatlo kadagiti 315 a nabotosan a kameng ti Kamara iti eleksion idi Mayo 12 ti nangideklararen iti suportada ken ni Romualdez, kasinsin ni Presidente Marcos.
₱20/kilo a bagas, mailaklakon iti Laguna Kadiwa
“Supermajority daytoy,” kinuna ni Suarez, tesorero ti Lakas-CMD. Inawaganna ti napasamak a kas nalawag a panangipeksa iti panagtalek iti liderato ken legislative track record ni Speaker Romualdez.
“Sipud idi malem ti Sabado (Mayo 17), saan a nababbaba ngem 240 a miembro ti nagpirma iti manipesto ti panangsuporta--ket agtultuloy nga umad-adu dayta a bilang. Saan laeng a maipapan iti party politics daytoy. Maipapan daytoy iti panagkaykaysa, nagapuanan, ken panagtalek iti naannayas a panangiwardas ken addaan prinsipio a panangidaulo ti Speaker,” kinuna ti deputy speaker ti maika-19 a Kongreso.
Kinuna ni Suarez a ti manipesto ket sinuportaran dagiti kongresman manipud iti amin a dadakkel a grupo--a pakairamanan ti Lakas-CMD, National Unity Party (NUP), Nationalist People’s Coalition (NPC), Nacionalista Party (NP), Partido Federal ng Pilipinas (PFP), ken ti Party-list Coalition Foundation Inc. (PCFI)--maysa a nalawag a pagilasinan ti kabaelan ti Speaker a mamagkaykaysa iti nadumaduma a grupo iti Kamara. (Ellson Quismorio/MANILA BULLETIN)
