Pinagtignay ti Philippine National Police–Criminal Investigation and Detection Group (PNP-CIDG) ti nadumaduma a tracker team iti pagilian a makikoordinar iti International Police Organization (Interpol) tapno maarestar ni Harry Roque nga agkidkiddaw iti asylum iti The Netherlands; Cassandra “Cassy” Ong; ken dagiti 49 a nairman iti mapapati nga illegal nga aktibidad ti Philippine Offshore Gaming Operator (POGO) iti Siudad ti Angeles, Pampanga.
Segun ken ni Police Maj. Gen. Nicolas D. Torre III, CIDG director, naisaaden dagiti tracker team iti 24/7 sipud idi Mayo 15, kas paset ti napabileg nga “Oplan Pagtugis,” ti operasion maibusor kadagiti pugante ken wanted a tao.
Nayetnag ti warrant of arrest a maibusor kada Roque, Ong, ken dagiti 49 pay gapu iti kaso a qualified trafficking in persons (panaglabsing iti Section 4 [I] mainaig iti Section 6 (C) ti Republic Act 9208 wenno ti Anti-Trafficking in Persons Act of 2003 as amended), manipud iti Angeles City Regional Trial Court Branch 118.
Kinuna ni Torre nga idi pay Mayo 16 a sisiimen ken sasapsapulen dagiti tracker team dagiti 51 nga akusado a nadakamat iti warrant of arrest. Innayonna a makikoordinar ti CIDG iti Interpol tapno maipan ni Roque iti red notice, tapno mapakaammuan dagiti polis ti sabali a pagilian a sapulen ken kemmegenda ni Roque.
ICC prosecutor Karim Khan, naglusulos
Idi Septiembre 2024, pimmanaw ni Roque iti Filipinas kalpasan a in-cite in contempt ti Kamara gapu iti dina idadar-ay kadagiti hearing mainaig iti illegal nga aktibidad ti POGO iti Lucky South 99 a nagpaayanna a kas abogado.
Idi met Agosto 2024, nakemmeg ni Ong iti Batam, Indonesia, a namkuatanna a tumabuno iti hearing ti Kamara. Iti sumuno a bulan, naibalud ni Ong iti Correctional Institute for Women iti Mandaluyong City gapu iti maipagarup a panagulbodna iti hearing, ngem nawayaan met laeng idi Disiembre 2024 idi nalpasen ti hearing. (Martin Sadongdong/Manila Bulletin//Lito Hilidon/Bannawag)
