Limapulo ket siam a nominee dagiti nangabak a party-list iti 2025 mid-term elections ti naiproklamar idi malem ti Lunes, Mayo 19, idinto a saan pay a nalawag ti gasat ti uppat pay a nominee gapu ta sinuspenso ti Commission on Elections (Comelec) en banc, a nakatugaw kas National Board of Canvassers (NBOC), ti proklamasionda.
Saan a naiproklamar ti Duterte Youth Party-list, nupay maikadua ti ranggona kadagiti nangabak ket maikari iti tallo a puesto iti Kamara; kasta met ti Bagong Henerasyon (BH) Party-list, a maikari iti maysa a puesto. Naitantan ti pannakaiproklamarda bayat a maur-uray ti desision ti Comelec kadagiti kasoda.
Sumangsango ti Duterte Youth iti disqualification petition gapu iti mapapati a misrepresentation; idinto a ti BH, sangsanguenna ti panaglabsing iti 261 (i) ti Omnibus Election Code a mainaig iti probision a mangiparit iti pannakibiang dagiti opisial ken empleado ti publiko.
Agdagup iti 53 a party-list ti nakastrek iti maika-20 a Kongreso, a mangrugi a inton Hulio.
Proklamasion ti dua a party-list, itantan ti Comelec
Ti Akbayan Party-list, nga idi damo ket saan a nakastrek iti sirkulo dagiti nangabak idi eleksion ti 2022, ti sorpresa iti eleksion ita a tawen kalpasan a naalana ti umuna a ranggo. Tallo a puesto iti Kongreso ti ukoparenna, a pagtugawan kas kongresman da human rights lawyer Chel Diokno, dati a komisioner ti National Youth Commission (NYC) ken agdama a kongresman Percival Cendaña, ken ti manangitandudo iti karbengan dagiti babbai a ni Dadah Iram Isnula.
Ti Tingog Party-list, a karaman met kadagiti top finisher kabayatan ti 2022 elections, maikatlo ita a tawen ken nakaaala met laeng iti tallo a puesto, a pagtugawan da Andrew Julian Romualdez, Jude Acidre, ken Marie Josephine Diana "Happy" a Calatrava.
Kabayatanna, makipaset manen iti sumaruno a Kongreso ti 4PS, ACT-CIS, ken Ako Bicol Party-list kalpasan a nakaranggoda a maikapat, maikalima, ken maikanem, kas panagsaganadda. Nakaalada iti sagdudua a puesto.
Dagiti dadduma pay a nangabak a party-list nga addaan iti saggaysa a puesto: Uswag Ilonggo, Solid North Party, Trabaho, Cibac, Malasakit@Bayanihan, Senior Citizens, PPP, ML, FPJ Panday Bayanihan, United Senior Citizens, 4K, LPGMA, COOP-NATCCO, Ako Bisaya, CWS, Pinoy Workers, AGAP, Asenso, Pinoy, Agimat, TGP, Sagip, ALONA, 1-RIDER Party-list, Kamanggagawa, GP, Kamalayan, Bicol Saro, Kusug Tausug, ACT Teachers, One Coop, KM Ngayon Na, Abamin, BH - Bagong Henerasyon, TUCP, Kabataan, APEC, 1Tahanan, Magbubukid, Ako Ilocano Ako, Manila Teachers, Nanay, Kapuso PM, SSS-GSIS PENSYONADO, DUMPER PTDA, Abang Lingkod, Pusong Pinoy, Swerte, ken Philreca. (Joseph Pedrajas/MANILA BULLETIN)
