Manipud idi Mayo 3, iti report ti Department of Health (DOH), 87 a porsiento ti panagbaba ti kaso ken natay iti COVID-19 no idilig iti 2024.
I'toy a tawen, 1,774 laeng a kaso ti naireport, a dakkel a bimmabaanna iti 14,074 a kaso a nairekord idi 2024.
Aganay met a 1.13 a porsiento ti case fatality rate iti agdama, a mangipasimudaag iti simmayaat a resulta para kadagiti naapektaran.
Napaliiw pay ti DOH ti in-inut a panagbaba ti linawas a kaso ti Covid-19.
Sen. Estrada, kompiansa nga agtalinaed ni Escudero a kas presidente ti Senado
“Ipamatmat dagiti nabiit pay a trends a bimmaba bassit dagiti naipadamag a kaso iti napalabas a tallo agingga iti uppat a lawas,” kinuna ti DOH.
Iti nagbaetan ti Marso 23 ken Abril 5, nakairekord ti DOH iti 71 a kaso.
Bimmaba daytoy a bilang iti 65 a kaso manipud Abril 6 agingga iti 19, a mangipasimudaag iti agtultuloy a panagbaba ti trend.
Iti laksid dagitoy, indagadag latta ti DOH iti publiko nga agtalinaedda a naridam ken agtultuloy a surotenda dagiti standard health protocol.
Binalakadanna met ti publiko nga itultuloyda nga aramiden dagiti addang a pangprebentar a mangsalaknib met kadagiti dadduma a sakit, kas iti panagusar iti face mask kadagiti healthcare facilities; panagtalinaed iti pagtaengan no makarikna kadagiti sintoma; panangabbong iti ngiwat no aguyek wenno agbaen; masansan a panagbuggo kadagiti ima babaen ti sabon ken danum; ken nasapa a panagpakonsulta iti doktor para kadagiti sintoma nga umarngi iti trangkaso. (Merlina Hernando-Malipot/MANILA BULLETIN)
