Saan a matuloy ita nga aldaw, Mayo 19, ti proklamasion ti dua a nangabak a party-list iti 2025 midterm election, kas inkeddeng ti Commission on Elections (Comelec) nga agpapaay a kas National Board of Canvassers (NBOC).
Segun ken ni George Erwin Garcia, Comelec chairman, inkeddeng ti Comelec en banc a masuspenso ti proklamasion ti dua a partylist bayat a maur-uray ti pannakarisut ti agdama a kasoda agingga inton Hunio 30. Ngem dina kaipapanan daytoy a saanen a maikkan iti saad iti Kamara dagitoy a party-list.
Inlawlawag ni Garcia nga inton Hunio 30 pay laeng a pormal nga agakem dagiti mangibagi iti party-list.
Saan nga imbutaktak ni Garcia no ania dagiti party-list a masuspenso ti proklamasionda, ngem kinunana a ti maysa kadakuada ket nakaala iti tallo a puesto iti Kamara, idinto a maysa laeng a pagsaadan ti naala ti sabali.
59 a kongresman ti party-list, naiproklamar; 4 a nominee, naitantan ti proklamasionda
Ti laeng party-list nga Akbayan, Duterte Youth, ken Tingog ti nakaala iti tallo a pagsaadan iti Kamara.
Kadagitoy a tallo, ti laeng Duterte Youth ti addaan iti lima a tawenen a kaso a nakapila iti Comelec, gapu ta saanda met a pudpudno nga ibagian dagiti agtutubo.
Maibatay iti rekord ti Comelec, saan a nakarehistro a party-list ti Duterte Youth.
Iti sabali a bangir, kinuna ni Garcia a 63 a party-list nominee ti manamnama a maiproklamar. (Joseph Pedrajas/Manila Bulletin//Lito Hilidon/Bannawag)
