Kiniddaw ti Office of the Prosecutor ti International Criminal Court (ICC) iti Pre-Trial Chamber I (PTC I) a maitantan koma ti naikeddeng a petsa ti panangidatag iti napateg nga ebidensia ken kinasiasino dagiti agpaay a saksi iti kaso ni dati a presidente Rodrigo Duterte a crimes against humanity, gapu iti kinatalged ken "judicial economy."
Iti dokumento a naipaskil iti ICC website, kiniddaw ni dati a prosecutor Karim Khan a maitantan koma ti deadline ti panangiparang kadagiti saksi a nadakamat iti warrant of arrest ni Duterte agingga inton Hulio 1, nga isu met ti general disclosure deadline.
Kiniddaw pay ti prosekusion a mayalud-od koma ti deadline ti panangidatag iti saan a pannakaipakaammo ti kinasiasino dagiti saksi agingga inton Hunio 20, manipud iti dati a deadline a Mayo 23.
Segun iti prosekusion, masapul a maipasdek koma ti umdas a wagas ti panangsalaknib, ta mabalin nga agpeggad ti biag dagiti saksi no maiparang a dagus ti kinasiasinoda.
Sen. Estrada, kompiansa nga agtalinaed ni Escudero a kas presidente ti Senado
Kinuna ti prosekusion a nainkalintegan ti kiddawda ken maitunos kadagiti kalintegan ni Duterte segun iti article 67(1), ken iti kalintegan dagiti saksi kas maibatay iti 68(1) ti Rome Statute.
Malaksid iti daytoy a kiddaw, masapul met a risuten ti PTC I ti isyu ti hurisdiksion nga indatag dagiti abogado ni Duterte.
Naikeddeng a maaramid ti confirmation of charges ni Duterte inton Septiembre 23. (Raymund Antonio/Manila Bulletin//Lito Hilidon/Bannawag)
