Im-imbestigaren ti Department of Agriculture (DA) dagiti maipagarup a suitik a negosiante a manggunggundaway kadagiti lokal a mannalon iti kangitingitan ti panagaapit.
Daytoy ti kinuna ti DA idi Mayo 19 kalpasan a maawatda ti report dagiti lokal a mannalon a ₱13 agingga ₱15 laeng ti kada kilo ti irik kadagiti dadduma a paset ti Luzon.
Adayo a nalaklaka daytoy ngem iti inkeddeng ti National Food Authority (NFA) a presio ti nadalus ken nabilag nga irik a manipud ₱18 agingga ₱24 kada kilo.
Segun ken ni Sekretario ti DA Francisco Tiu Laurel Jr., im-imbestigarendan no asino dagiti nanggatgatang iti irik iti kasta kalaka a presio.
Pimmatay iti 2 a polis iti Bulacan, natay a nakipinnaltog iti Cagayan
Kinuna ni Laurel nga 32 a lugar iti pagilian ti natakuatanda a nalaka ti presio ti irik.
Maibatay iti datos ti DA, ti kalakaan a presio ti irik ket nailanad iti Bataan idi Abril 30, nga aggatad iti ₱13.50 kada kilo.
Aggatad iti ₱14 kada kilo ti irik kadagiti dadduma a paset ti pagilian kas iti Cagayan, Nueva Vizcaya, ken Quirino iti Cagayan Valley; Kalinga ken Ifugao iti Cordillera Administrative Region (CAR); Compostela Valley iti Southern Mindanao; ken Sultan Kudarat iti Central Mindanao.
Namandaran ti NFA a mangsigurado iti 15-aldaw a lebben a suplay ti bagas ti pagilian para kadagiti panawen ti didigra ken kalamidad, babaen ti panaggatangda iti irik kadagiti lokal a mannalon. (Stephanie Sevillano/PNA//Lito Hilidon/Bannawag)
