Nagprotestar ti Duterte Youth ken ti Bagong Henerasyon (BH) Party-list a saan a naiproklamar idi Mayo 19, iti Commission on Elections (Comelec).
Segun kadagiti dua a party-list, mano laeng nga orasen sakbay ti naikeddeng a proklamasion idi Lunes (Mayo 19) idi napakaammuanda maipapan iti pannakaitantan ti proklamasionda.
Adda sangsanguen ti Duterte Youth a lima a tawenen a petition for disqualification gapu iti maipagarup a misrepresentation; idinto nga adda kaso ti BH a panaglabsing iti Omnibus Election Code (261 (i)) a mangiparit iti pannakabiang dagiti opisial ken empleado ti gobierno.
Kinuestionar ti Duterte Youth no apay a dinesisionan ti Comelec ti kasoda idi 2019, idinto a napalubosanda nga agakem iti Kamara iti napalabas a dua nga eleksion.
Pananggatang ti OWWA iti ₱1.4-bilion a gatad ti daga, imbestigaren ti DMW
Segun iti Duterte Youth, saanda a basol no saan a winaswas ti Comelec ti kasoda kalpasan ti hearing idi 2019.
Kinuna ni daulo ti Duterte Youth Ronald Cardema nga idatagda iti Korte Suprema ti desision ti Comelec.
Iti sabali a bangir, kinuna ni BH Party-list Rep. Bernadette Herrera nga awan naawatda a pakaammo wenno pakdaar manipud iti Comelec maipapan iti pannakaitantan ti proklamasionda. Innayonna a saanda a napakaammuan mainaig iti naipila a reklamo maibusor kadakuada, isu a saan a nainkalintegan ti pannakasuspenso ti proklamasionda.
Dinakamat ni Herrera ti paglintegan ti Comelec nga agkunkuna nga agtuloy latta ti proklamasion agingga a di pinal a maresolbar ti kaso. (Joseph Pedrajas/Manila Bulletin//Lito Hilidon/Bannawag)
