Serioso ti Department of Migrant Workers (DMW) iti gandatda a mangsukimat iti kontrobersial a pananggatang ti Overseas Workers Welfare Administration (OWWA) iti ₱1.4 a bilion a balor ti daga bayat ti panagakem ni dati nga administrador ti OWWA Arnell Ignacio, gapu iti maipagarup a panaglabsing iti proseso ken kaawan ti umno nga autorisasion.
Kinuna ni Sekretario ti DMW Hans Leo Cacdac idi Mayo 18, adu a panaglabsing ti mabalin a naaramid iti pananggatang iti daga.
Kinuna ni Cacdac a napagsasaritaanda daytoy a transaksion iti uppat a miting dagiti Board of Trustees (BOT) ti OWWA, ket naidanonnan daytoy ken ni Presidente Ferdinand Marcos Jr. ket ammodan a pannakaikkat iti akem (ni Ignacio) ti pagbanagan daytoy.
Nailatang ti ₱1.4 a bilion a daga para iti pannakaipatakder ti “halfway house” a mabalin a pagdagusan dagiti agawid nga overseas Filipino workers (OFW), nangruna iti panawen ti didigra kas iti angol.
₱200 a nayon ti sueldo, tingitingen pay dagiti senador
Ngem kinuna ni Cacdac a saan nga inanamongan ti BOT ti OWWA ti nasao a proyekto.
Kinuna ni Cacdac a pondo ti gobierno ti mausar iti daytoy a proyekto a nailatang iti General Appropriations Act para iti panagawid dagiti OFW, ngem nayakar a paggatang iti daga nga awan pammalubos ti BOT ti OWWA.
Kinuna ni Cacdac nga agsapsapulda pay iti dadduma a tao a nairaman iti transaksion, gapu ta adda nabukel a sabali a komite a mangaprobar ken mangitandudo iti transaksion, ket linabsanda ti sibubukel a Board of Trustees.
Innayon ni Cacdac nga ad-adalenda no ituloyda pay ti proyekto.
Ni Cacdac, kas sekretario ti DMW, ti agpapaay a chairman ti OWWA BOT.
Bayat a masursurat daytoy, maikagkagumaan ti pannakakontak ken ni Ignacio para iti komentona. (Marita Moaje/PNA//Lito Hilidon/Bannawag)
