Awan ti mailaksid wenno mailisi iti pannakaimbestigar iti ₱1.4 a bilion ti balorna a kontrata iti daga a binukel ti Overseas Workers Welfare Administration (OWWA), kinuna ni Sekretario ti Department of Migrant Workers (DMW) Hans Leo Cacdac idi Mayo 20.
Segun ken ni Cacdac, suksukimatenda a nalaing dagiti nalabsing a proseso ken kinaawan ti umno nga autorisasion iti pananggatang ti OWWA iti daga bayat ti panagakem ti dati nga OWWA administrator a ni Arnell Ignacio.
Adda iti asideg ti Ninoy Aquino International Airport Terminal 1 iti Siudad ti Parañaque ti daga, a pangipatakderanda koma iti halfway house project para kadagiti Overseas Filipino Worker (OFW).
Kinuna ni Cacdac a kutkutkotenda pay daytoy nga isyu ta adu ti mabalin a nalabsing iti pananggatang iti daga, idinto nga awan ti pammalubos ti Board of Trustees ti OWWA.
Pagalagadan iti MAIFIP mainaig iti pannakaiparit ti guarantee letter, iruar ti DOH inton Pebrero
Innayon ni Cacdac a binaonnan ni DMW Undersecretary Patricia Yvonne Caunan a mangsalaknib iti OWWA Trust Fund, ken dagiti pondo nga aggapu iti national budget.
Ngem kinuna ti Malakanyang, idi Mayo 19, a saan a nakuti ti trust fund ken awan ti pagilasinan a nausar daytoy iti pannaggatang iti daga. (Marita Moaje/PNA//Lito Hilidon/Bannawag)
