Namnamaenen ti Commission on Elections (Comelec) ti panagkamang ti Duterte Youth Party-list iti Korte Suprema kalpasan ti pangngeddeng ti Comelec kas National Board of Canvassers (NBOC), a mangsuspenso iti proklamasionda.
Impila ni Duterte Youth Chairman Ronald Cardema idi Martes (Mayo 20), ti petition for certiorari ken nagkiddaw iti temporary restraining order (TRO) iti Korte Suprema maibusor iti panangitantan ti Comelec iti pannakaiproklamar ti party-list-da gapu iti grave abuse of discretion.
Ngem saanen a nasdaaw ni Comelec Chairman George Erwin Garcia ti tignay ti Duterte Youth.
Tinakderan ketdi ni Garcia ti inaramidda ket kinunana a nasaysayaat laengen a masuspenso ti proklamasion ti maysa a party-list ngem iti maibabawi ti kandidaturada ken mawaswas ti posisionda.
SEC, nangiruar iti AI chatbot a mangsungbat kadagiti saludsod ti publiko
Segun ken ni Garcia, mabalin latta nga ipaulog ti Comelec ti pangngeddengda iti kasasaad ti Duterte Youth uray pay no naiproklamardan.
Kinuna ni Garcia a panunoten koma ti Duterte Youth party-list a daytoy ti kasayaatan a gundaway a maresolbar ti kasoda, ta umay nga umay ti tiempo a masapul a risuten ti kasoda. (Joseph Pedrajas/Manila Bulletin//Lito Hilidon/Bannawag)
