Kinuna ni Senador Risa Hontiveros ita a Mierkoles, Mayo 21 a silulukat iti posibilidad nga agbalin nga standard bearer ti opposition bloc para iti 2028 presidential elections.
Segun ken ni Hontiveros, sigurado nga addanto progresibo wenno repormista nga alternatibo nga ilaban ti oposision iti sumaruno nga eleksion a mangbalubal iti kandidato a manoken dagiti adda iti makunkuna a Duterte bloc wenno dagiti adda iti Marcos bloc.
Ket isu, “silulukat iti amin a posibilidad," kinuna ti senador.
“Diak ibagbaga a saan. Silulukatak iti amin a posibilidad. Ket dayta ti kidkiddawek kadagiti amin nga adda iti oposision wenno independent bloc, a silulukattayo iti amin a posibilidad ken iti tunggal maysa, para iti pagimbagan ti oposision ken para iti pagimbagan dagiti kailiantayo,” innayonna.
Malakanyang kadagiti opisial ti gobierno nga agkusit: Maikkatkayo amin
“So, at least, adda third slate, at least ,third candidate. Diak pay ammo no siasinoda. Ta paset dayta ti selection process a namnamaek a madiseniotayo kalpasan ti umuna a siam a bulan a panamagkaykaysatayo iti bukodtayo a puersa,” kinuna ni Hontiveros.
Iti sumaruno a siam a bulan, kinuna ni Hontiveros a prioridad ti oposision ti panamagkaykaysa nga umuna kadagiti nakintinnulong kadakuada bayat ti kampania idi Mayo 2025 ken mangbukel iti panagtalek iti tunggal maysa.
“No aramidentayo dayta nga homework, dayta ti solido a bugas a mabalintayo nga ad-adda a patibkeren wenno sukisoken,” impalgakna. (Hannah L. Torregoza/MB)
