Nagsapata dagiti nangabak nga opisial ti Gunglo Dagiti Mannurat nga Ilokano iti Filipinas ken Ballasiw-Taaw (GUMIL Filipinas) kalpasan ti pangrikep a programa ti Pasnaan 14 Workshop iti Bangui National High School, Ilocos Norte, idi Mayo 18, 2025.

Imbagian ni Prof. Luvee Hazel Calventas-Aquino (maikawalo manipud kanigid, iti ladawan) ni Dr. Virgilio Julius P. Manzano Jr., presidente ti Mariano Marcos State University (MMSU), a namagsapata kadagiti opisial.

Indauluan ni Ariel Sotelo Tabag, presidente, dagiti nagsapata dagiti opisial, nga agtakem agingga iti 2027, da Elizabeth Madarang-Raquel, bise presidente; Faye Q. Flores-Melegrito, sekretaria heneral; Anna Liza M. Gaspar, tesorera; Rolando A. Seguro Jr., auditor; Estela A. Bisquera-Guerrero, business manager; ken Mark Louie Tabunan, agirakurak.

Dagiti direktor, da Avelina Fe Carlos-Camacho, Marlyn Garcia-Del Rosario, Dr. Raquelito B. Cenal, Dr. Freddie P. Masuli, Delfin P. Dumayas, Domingo A. Presa, ken Mario T. Tejada.

Nasional

Malakanyang kadagiti opisial ti gobierno nga agkusit: Maikkatkayo amin

Saan a nakadar-ay da Neyo E. Valdez, maysa kadagiti direktor, ken Vice Gov. Remy N. Albano, ex-officio director.

Pinadayawan ni Dr. Manzano ti panagtultuloy ti GUMIL Filipinas (GF) iti dakkel nga akemna iti pannakatagiben ti kultura nga Ilokano babaen ti lengguahe ken literatura.

Linagipna pay a dakkel ti naitulong dagiti sarita ken komiks a nabasana iti Bannawag idi ubing pay tapno mapatanor ti nasidap ken managpartuat a panunotna iti propesionna kas inhiniero ken managsukisok.

Impannakkelna met a kanayon a kadua ti GUMIL ti MMSU gapu iti panagtultuloy dagiti sukisok dagiti propesor ken estudiante iti Literatura Ilokana. Malaksid kadagitoy, adda pay programa ti unibersidad a Master of Arts in Education, Major in Ilokano Studies ken ti sentro ti sukisok a Center for Ilokano and Amianan Studies.

Impasiguradona a silulukat ti ruangan ti MMSU kadagiti programa ti GUMIL.

Naangay ti umuna a board meeting dagiti opisial kalpasan ti panagsapatada.

Namnamaen ti liderato ni Tabag ti ad-adu pay a proyekto. Maitultuloy ti Pasnaan a workshop iti creative writing ken ti panagilibro kadagiti sinurat dagiti mannurat nga Ilokano babaen ti Tagnawa Series.

Mairusat met ito'y a tawen ti book festival a maawagan iti Amianan Book Festival, ken ti komperensia iti lengguahe, literatura, ken kultura a maawagan iti Tungtongan.

Bayabayen met ti GUMIL Filipinas dagiti chapter kadagiti programada a mailista ken mairusat inton agangay.

Nadutokan met a kas consultant ti GF da Bannawag Editor Cles B. Rambaud, Ric Agnes, ken Judge Plotinus T. Sanchez. Mammagbaga met dagiti nagpaay a presidente ti GF a da Cagayan Board Member Vilmer V. Viloria, Arthur P. Urata Sr., Judge Vivencio S. Baclig (Ret.), Baldovino Ab. Valdez, Dionisio S. Bulong, Jose A. Bragado, ken Honor Blanco Cabie.

Kasta met a nadesignaran dagiti pangulo ken kameng dagiti komite ti gunglo tapno naan-annayas dagiti manamnama a maitultuloy ken mairusat a programa ken aktibidad.

Idauluan ni Dr. Freddie P. Masuli ti Seminar-Workshop Committee a pagpaayan a kameng da Faye Q. Flores-Melegrito, Mark Louie Tabunan, Domingo A. Presa ken Rene Boy Abiva (interim a presidente ti GUMIL Nueva Vizcaya).

Ni Tabunan ti mangidaulo iti Editorial, Publication and Translation Committee a pagkamengan da Flores-Melegrito, Mario T. Tejada, Neyo E. Valdez, ken Abiva.

Agpaay ni Anna Liza M. Gaspar a mangidaulo iti Finance Committee a pagkamengan da Rolando A. Seguro Jr., Estela A. Bisquera-Guerrero, Marlyn Garcia-Del Rosario, ken Domingo Rudolfo (presidente ti GUMIL Isabela).

Idauluan ni Valdez ti Legal and Research Committee a pagkamengan da Delfin P. Dumayas, Dr. Masuli, Ma. Teresa Bisquera-Beñas (presidente ti GUMIL Abra), ken Dr. Jaime G. Raras (presidente ti GUMIL Ilocos Sur).

Ni Bisquera-Guerrero ti mangidaulo iti Marketing and Promotion Committee a pagkamengan da Gaspar, Garcia-Del Rosario, Presa, ken Dr. Raquelito B. Cenal.

Idauluan ni Tejada ti Awards Committee a pagkamengan da Dr. Masuli, Tabunan, Hermilinda T. Lingbaoan-Bulong, ken Cles B. Rambaud.

Ni Avelina Fe Carlos-Camacho ti mangidaulo iti Ethics Committee a pagkamengan da Elizabeth Madarang-Raquel, Djuna R. Alcantara (presidente ti GUMIL La Union-San Fernando City), Fernando B. Sanchez (presidente ti GUMIL Pangasinan), ken Vice Governor Remy N. Albano.

Idauluan ni Dr. Cenal ti Membership Committee a pagkamengan da Flores-Melegrito, Seguro, Dumayas, ken Presa.

Ni Flores-Melegrito ti mangidaulo iti GF Secretariat Special Committee a pagkamengan da Seguro, Tabunan, Dr. Cenal, ken Presa.

Idauluan ni Garcia-Del Rosario ti GUMIL Saranay Special Committee a pagkamengan da Madarang-Raquel, Gaspar, Mila Fernandez (presidente ti GUMIL Oahu), ken Prodie Gar. Padios (presidente ti GUMIL Canada).

Ni Seguro ti mangidaulo iti GUMIL Pagtaengan Special Committee a pagkamengan da Gaspar, Bisquera-Guerrero, Carlos-Camacho, ken Valdez.

Idauluan ni Dumayas ti GUMIL Dan-ay Special Committee a pagkamengan da Madarang-Raquel, Carlos-Camacho, Luvimin T. Aquino Sr. (presidente ti GUMIL Benguet), ken Bisquera-Beñas.

Ni Madarang-Raquel ti mangidaulo iti GUMIL Kammayet Special Committee a pagkamengan da Flores-Melegrito, Bisquera-Guerrero, Tejada, ken Gladys Menor.

Maipalagip a malaksid nga opisialda iti GF, agserserbi pay a chapter president da Flores-Melegrito (Metro Manila), Dr. Cenal (Cagayan), ken Dumayas (Ilocos Norte). (MLT)