Impaganetget ti Metropolitan Manila Development Authority (MMDA) a dakkel a katulongan ti pannakaipatungpal iti "No Contact Apprehension Policy" (NCAP) iti pannakadisiplina dagiti motorista kalpasan nga inikkat ti Korte Suprema ti temporary restraining order (TRO) daytoy.
Segun iti MMDA, naintiempuan ti pannakaikkat ti TRO ta agsagsagana ti ahensia iti manamnama a panagkaro ti trapik iti EDSA gapu iti naikeddeng a pannakatarimaan ti kalsada.
Impanamnama ti MMDA a tinamingdan dagiti parikut iti single ticketing system ken baro a pagalagadan ti NCAP a naidatag iti petision.
Naipatungpal ti NCAP kadagiti lima a local government unit iti Kamanilaan — Manila, Quezon City, Valenzuela, Muntinlupa, ken Parañaque babaen ti resolusion nga impaulog ti MMDA idi Pebrero 2016. Ngem sinupiat daytoy dagiti grupo ti transportasion ket kinuestionarda ti konstitusionalidad ti NCAP, isu a nangiruar ti Korte Suprema iti TRO idi Agosto 30, 2022.
Sen. Estrada, kompiansa nga agtalinaed ni Escudero a kas presidente ti Senado
Itay napan a lawas, nangidatag ti MMDA iti Motion for Reconsideration iti Korte Suprema, babaen ti Office of the Solicitor General, tapno maikkat ti TRO ken naan-anay a mataming ti nakaro a trapik kadagiti kangrunaan a kalsada iti Metro Manila ken masalakniban ti kinatalged dagiti agus-usar iti kalsada. (Aaron Recuenco/Manila Bulletin//Lito Hilidon/Bannawag)
