Impasigurado ni Sekretario ti Department of Agriculture (DA) Francisco Tiu Laurel Jr. ita nga aldaw, Mayo 22, nga agtultuloy latta ti nayusuat a ₱20 kada kilo ti bagas, a nanaganan iti "Benteng Bigas Meron Na," iti laksid ti panangidatagna iti courtesy resignation.
Dakdakamaten ti programa ti pannakailako iti ₱20 kada kilo ti bagas a napintas ti kalidadna a manipud iti lebben ti National Food Authority (NFA).
Daytoy ti kinuna ni Laurel kalpasan ti panagbilin ni Presidente Marcos Jr. kadagiti amin a sekretario ti gabinete a mangidatagda iti courtesy resignation tapno marepaso ti ehekutibo kalpasan ti nagbalin a resulta ti 2025 midterm election.
Segun ken ni Laurel, uray no bilang masukatan iti akemna, kabaelan ti mangsukat nga ipatungpal daytoy a programa ta naisaaden ti napintas a sistema.
DOJ, pakanselarna ti pasaporte ni Harry Roque
Maipatungpal ti umuna a paset ti programa iti Negros Oriental ken Negros Occidental; Samar, Eastern Samar ken Northern Samar; Southern Leyte ken Leyte; Bohol, Antique, Cebu, Iloilo, Capiz Biliran; Guimaras, Siquijor, Aklan, ken Mindoro.
Inton Hulio, maipatungpal ti maikadua a paset ti programa iti Zamboanga del Norte, Basilan, Cotabato City, Tawi-Tawi, Maguindanao del Sur, Maguindanao del Norte, Maguindanao, Davao Oriental, ken Sorsogon; idinto a maipatungpal ti maikatlo a paset iti Sultan Kudarat, Lanao del Norte, Catanduanes, Agusan del Sur, Sarangani, ken Dinagat Islands.
Innayon ni Laurel nga italeknan iti presidente no rumbeng nga agtuloy iti panagakemna a kas daulo ti DA. (Stephanie Sevillano/PNA//Lito Hilidon/ Bannawag)
