Tallo a tattao ti natay iti panagdinnungpar ti bus ken traysikel iti national highway iti Barangay San Pablo, Santo Domingo, Ilocos Sur sakbay ti parbangon ita a Huebes, Mayo 22.
Binigbig ni Police Lt. Roger Retreta, deputy chief of police ti Santo Domingo, dagiti biktima a ni Claro V. Tapaya Sr., 65, drayber ti traysikel, ken dagiti pasaherona a da Michelle manipud iti Barangay Pagburnayan, Vigan City, Ilocos Sur ken Grace ti Barangay Bongtolan, Vigan City.
Segun iti imbestigasion, nagsardeng ti traysikel iti abaga ti kalsada tapno ag-U turn ngem saan a nadlaw ni Tapaya ti sumungsungad a bus ti GMW, a nagresulta iti panagdinnungparda.
Nagsagrap dagiti biktima iti nakaro a pannakadunor ket naitaray dagitoy iti maysa nga ospital a nakaideklararan a natayda.
Nueva Vizcaya, ginger capital ti Filipinas
Saan a nasugatan ti drayber ti bus a ni Julius P. Jardinero, 42, taga-Barangay Pagsanaan, Magsingal, Ilocos Sur, ken dagiti pasaherona.
Agtultuloy pay laeng ti follow-up investigation ti polisia. (Freddie Lazaro/MANILA BULLETIN)
