Indeklarar ti Malakanyang ti Hunio 6, 2025 a kas regular holiday iti entero a pagilian gapu iti pannakarambak ti Eid'l Adha, wenno ti Feast of Sacrifice.
Pinirmaan ni Executive Secretary Lucas Bersamin ti Proclamation No. 911 nga impaulog ni Presidente Ferdinand Marcos Jr. idi Mayo 21.
Maibatay iti proklamasion, inrekomendar ti Commission on Muslim Filipinos a maideklarar ti Hunio 6 a kas national holiday gapu iti 1444 Hijrah Islamic Lunar Calendar.
Ti Eid'l Adha ti maikadua a holiday dagiti Muslim a tinawen a marambakan iti entero a lubong ta maibilang daytoy a nasansantuan ngem iti Eid'l Fitr a tanda ti panagleppas ti Ramadan. (Argyll Cyrus Geducos/Manila Bulletin//Lito Hilidon/Bannawag)
Nasional
