Nakasaganan ti probinsia ti Ilocos Norte a mangsangaili iti Palarong Pambansa ita a tawen, babaen ti Department of Education (DepEd) manipud Mayo 24 agingga 30.
Napan kinitan ni Gov. Matthew Marcos Manotoc ti Ferdinand E. Marcos Memorial Stadium iti Siudad ti Laoag a kangrunaan a pakaangayan ti Palaro.
Napan metten ni Manotoc kadagiti dadduma pay a venue ti paay-ayam iti probinsia. Kinunana nga agtultuloy ti inter-agency coordination tapno masigurado ti kinatalged, kinaorganisadpo, ken pakabuklan a balligi ti Palarong Pambansa.
Pinadanon met ni Manotoc ken dadduma pay nga opisial dagiti delegado a nangrugi nga agsangpet iti probinsia idi Mierkoles.
DOJ, pakanselarna ti pasaporte ni Harry Roque
Mapattapatta a 17,000 nga estudiante-atleta, coaches, opisial ti eskuelaan, ken technical personnel manipud iti amin a 17 a rehion iti pagilian ti manamnama a makipaset iti makalawas a kompetision.
Daytoy ti maikadua a gundaway a sangailien ti Ilocos Norte iti Palaro, immuna idi 1968.
Ti tema ita a tawen a “Nagkakaisang Kapuluan,” ipaganetgetna ti panagkaykaysa ti pagilian babaen ti isports.
Nairaman iti logo ti Palaro dagiti visual element a nainspirar iti inabel, ti nalatak a naabel-iti-ima a tela ti probinsia. Itampokna ti naestilo a naabel a pigura ni Teófilo Yldefonso, kaunaan nga Olympic medalist ti Filipinas a pagaammo kas “Ilocano Shark” a naipasngay iti Piddig, Ilocos Norte ken nakagun-od iti dua a bronze medal iti 1928 ken 1932 Olympic Games.
Maangay ti panglukat a seremonia inton Mayo 24 iti Marcos Memorial Stadium.
Manamnama a tumabuno da Presidente Ferdinand R. Marcos Jr., Education Secretary Juan Edgardo “Sonny” Angara, ken dagiti opisial ti probinsia nga idauluan da Manotoc ken Bise Gobernador Cecilia Araneta-Marcos. (Freddie Lazaro/MANILA BULLETIN)
