Indatagen ni Executive Secretary Lucas Bersamin ti panaglusulosna ita nga aldaw, Mayo 22, kas sungbat iti kiddaw ni Presidente Marcos a mangidatag ti courtesy resignation dagiti amin a sekretario ti gabinetena.
Maysa ni Bersamin kadagiti kameng ti gabinete a nangipila a dagus iti panaglusulosda kalpasan ti kiddaw ni Marcos a panaglusulosda itay agsapa ti Huebes.
Iti surat ni Bersamin, kinuna a maysa a dayaw ti panagbalinna a paset ti gabinete ni Marcos, ket itultuloyna ti agserbi kadagiti umili ti Filipinas nga agturong iti "Bagong Pilipinas."
Segun iti Presidential Communications Office (PCO), kiniddaw ni Marcos ti panaglusulos dagiti daulo ti gabinetena tapno maikkan iti waya a mangtingiting kadagiti nagapuanan ti tunggal ahensia ken kitaenna no asino dagiti agtultuloy nga agserbi a maitunos iti napabaro a prioridad ti administrasionna. (Betheena Unite/Manila Bulletin//Lito Hilidon/Bannawag)
