Napno iti ayamuom ti kagilgiling ken kapabpaburek a brewed a kape iti Carlos Padilla Convention Center ita nga aldaw, Mayo 23, 2025, iti opisial a pannakalukat ti 1st Nueva Vizcaya Coffee Festival, a nangawis kadagiti managayat iti kape, agmulmula ken aglaklako iti kape, ken dagiti maayatan a sangaili, kas paset ti 16th Grand Ammungan Festival ti Nueva Vizcaya.
Inorganisar ti Gobierno Probinsial ti Nueva Vizcaya babaen ti Provincial Tourism and Culture Office, ken iti pannakitinnulong ti Department of Trade and Industry, maitampok iti festival ti dumurdur-as nga industria ti kape iti probinsia, a pakaitampokan dagiti partisipante manipud kadagiti ili nga agmulmula iti kape a pakairamanan ti Ambaguio, Kasibu, Kayapa, Bagabag, ken Dupax del Sur.
Maangay bayat ti festival dagiti aktibidad a pakairamanan ti Brewing Competition, Latte Art Competition, ‘Kapetirya’ & Art Display, guided tastings kadagiti lokal a blend ti kape, ken adda pagtagilakuan kadagiti nadumaduma a lokal a napataud a produkto ti kape.
Maisayangat met dagiti panagsasarita ken workshops a pagpaayan kas speakers dagiti aggapu iti lokal a sektor ti kape, a mangibinglay kadagiti pannakaawat iti sustainable production, agri-preneurship, ken ti dumakdakkel a kultura ti coffee shop iti probinsia.
Presidente Marcos, kayatna a malpas ti Paitan Dam iti Pangasinan inton 2027
Babaen ti napigsa a suporta manipud kadagiti nadumaduma nga ahensia, ipaganetget ti nasao nga aktibidad ti idudur-as ti Nueva Vizcaya a kas kangrunaan a producer ti kape iti Region 2, ken ti panagkumitna a mangbangon iti narang-ay a value chain para kadagiti mannalon ken negosiante ti kape. (DTI Region 02)
