Winaswas ti Department of Justice (DOJ) ti kaso a naipila kontra iti dati a sekretario ti Department of Interior and Local Government (DILG) a ni Benjamin D. Abalos Jr. ken kadagiti walo nga agdama ken retirado nga opisial ti Philippine National Police (PNP) a nakipaset iti pannakaarestar ni daulo ti Kingdom of Jesus Christ (KOJC) Apollo Quiboloy.
Indarum ida ni dati a presidente Rodrigo R. Duterte iti kaso a malicious mischief ken violation of domicile maibatay iti Article 327 ken 128, kas panagsaganadda, ti Revised Penal Code (RPC).
Gapu daytoy iti panangisayangkat ti PNP iti operasion a mangkemmeg ken ni Quiboloy iti uneg ti solar ti KOJC iti Siudad ti Davao idi Hunio 10, 2024 babaen ti warrant of arrest nga impaulog ti korte gapu iti kaso a qualified human trafficking ken sexual assault.
Malaksid ken ni Abalos, naidarum met da hepe ti PNP General Rommel Francisco D. Marbil, Police Major General Ronald Oliver Lee, Police Brigadier General Aligre Martinez, Police Colonel Edwin Potento, Police Colonel Joselito Clarito, Police Lieutenant Colonel Lino Akiangan, Police Major General Mark Pespes, ken retirado a Police Brigadier General Ricardo Layug Jr.
Bersamin, economic team, pinagtalinaed ni Marcos idinto a sinuktanna ti sumagmamano a sekretario
Segun iti resolusion ti DOJ, awan ti pudno wenno legal a pakaibatayan iti pannakausig dagiti naidarum iti daytoy a kaso ta saan a napaneknekan nga adda malicious mischief wenno violation of domicile iti inaramidda, idinto a maipagarup a ti inaramidda ket paset ti legal nga annongenda, a masalakniban babaen ti presumption of regularity ti aramid dagiti opisial. (Jeff Damicog/Manila Bulletin//Lito Hilidon/Bannawag)
