Namnamaen ni Presidente Ferdinand Marcos Jr. a mausaren ti Paitan Dam inton 2027, a mangpadanum iti nasurok a 12,000 nga ektaria a taltalon iti Santa Maria, Pangasinan.
Indauluan ni Marcos ti groundbreaking ceremony ti Lower Agno River Irrigation System (LARIS) Paitan Dam ita nga aldaw, Mayo 23, a nangibinsabinsaana iti pagsayaatan nga ipaay ti dam no malpas daytoy.
Segun ken ni Marcos, saanton nga aglayus no matutudo ta maurnong ti danum iti dam a mabalin nga usaren iti panawen ti tikag, ket iti kasta, adda latta maapit dagiti mannalon iti ania man a panawen.
Ti Paitan Dam ti kangrunaan nga impraestruktura para iti pasayak a proyekto ti National Irrigation Administration (NIA) iti Rehion 1. Usaren daytoy ti danum ti Agno River, maysa kadagiti kadakkelan a karayan ti Filipinas, tapno mangipaay iti agtultuloy ken mataginayon a pasayak kadagiti taltalon iti Pangasinan, Tarlac, ken Nueva Ecija. (Betheena Unite/Manila Bulletin//Lito Hilidon/Bannawag)
