Saan nga agbalbaliw ti takder ni House Speaker Martin Romualdez iti pannakasalaknib ti kalintegan ti Filipinas iti West Philippine Sea (WPS), ket indanonna itay Mayo 22 ti nabileg a mensahena maibusor iti kumarkaro nga agresion ti China, kadagiti padana a parliamentarian iti Madrid, Spain.
Iti panagbitla ni Romualdez iti 29th Parliamentary Intelligence-Security Forum (PI-SF), pinasingkedanna ti di maisin a panagkumit ti Filipinas iti 1982 United Nations Convention on the Law of the Sea (UNCLOS) ken iti 2016 Arbitral Award a nangbigbig iti kalintegan ti pagilian iti bukodna nga Exclusive Economic Zone (EEZ) ken nangilaksid iti panangtagikua ti China iti entero a baybay.
Kinuna daytoy ni Romualdez iti baet dagiti report a pinaturongan ti bapor ti China Coast Guard (CCG) iti water cannon dagiti bapor ti Bureau of Fisheries and Aquatic Resources (BFAR) a nangisayangkat iti marine scientific research iti Pag-asa Cay 2 (Sandy Cay) iti WPS.
Dinagadag ni Romualdez dagiti demokratiko ken mangbigbig iti linteg a pagilian nga agridam ken agkaykaysada a mangkontra kadagiti taktika, propaganda iti internet, ken panangrakrak iti urnos ken paglintegan iti baybay.
Bersamin, economic team, pinagtalinaed ni Marcos idinto a sinuktanna ti sumagmamano a sekretario
Sinangaili ti Senado ti Spain ken indauluan ni dati a US Congressman Robert Pittenger ti 29th PI-SF a nangummong iti 40 a pagilian tapno agtutunosda kadagiti estratehia iti panangsaranget kadagiti pangta iti sangalubongan. (Ellson Quismorio/Manila Bulletin//Lito Hilidon//Bannawag)
