SIUDAD TI LAOAG – Inyalat ni Chrisia Mae Tajarros ti umuna a balitok a medalia ti Palarong Pambansa iti panangabakna iti girls’ secondary 3,000-meter run event iti orasna a 10 a minuto ken18.6 a segundo—naparpardas ngem iti dati a rekordna a 10:39.72 a nangyalatanna iti pirak (silver) iti Siudad ti Cebu itay napan a tawen.

Maysa a middle-distance runner, tubo ti Leyte ni Tajarros, agtawen iti 13, ken anak ti agassawa a panaglako iti ikan ti pangbibiagda iti pamiliada.

Inyalat met ni Mary Mae Magbanua ti CARAGA (10:48.4) ti maikadua a puesto; ni met Nathalie Faye Miguel ti Ilocos Region (10:50.4) ti nangyalat iti bronse iti daytoy a salip iti lumba a naangay iti Ferdinand E. Marcos Memorial Stadium.

Ni Chrisia Mae Tajarros iti panangabakna iti umuna a Palaro gold iti Laoag. (Rio Deluvio/PSC Media Pool)

Sumaruno a pakisalipan ni Tajarros, ag-Grade 9 itoy umay a panaglukat dagiti klase, ti 1,500m event inton Huebes, May 30, iti isu met laeng a venue ti sports tournament nga inorganisar ti Department of Education iti tulong ti Philippine Sports Commission.

Nasional

Kaaduan a Filipino, kayatda nga ipangpangruna ni Sara Duterte dagiti kasapulan ti pagilian, sanguenna dagiti kasona a panagkunniber -- SWS

Iti secondary boys' long jump final, nagtabla da Efosa John Paul Aguinaldo ti Eastern Visayas ken MJ Lora ti CALABARZON iti 6.90m ngem nagun-od ni Aguinaldo ti balitok a medalia kalpasan ti maikadua a panangpadasna, 6.83m; idinto a 6.59 ken ni Lora.  

Iti girls' secondary discus throw, nangabak ni Courtney Trianga ti Bikol (36.72m) idinto nga inyalat ni Sam Garcia ti CALABARZON ti titulo iti girls' elementary category ti isu met laeng nga ay-ayam.

Iti weightlifting, inyalat ni Matthew Diaz ti CALABARZON ti titulo iti boys’ secondary 48kg class bayat ti panangbuya kenkuana ni ikitna nga sport icon ken tournament director Hidilyn Diaz-Naranjo iti salip a naangay iti Laoag Central Elementary School. Impakita ni Matthew Diaz ti pigsana nga agbagkat iti 73kg iti snatch, ken 93kg iti clean & jerk. Maikadua ni Generosmel Cortez ti Zamboanga Peninsula; maikatlo ni Rayney Joy Espina ti NCR. (Mark Rey Montejo, Manila Bulletin/ Cles B. Rambaud, Bannawag)