Tinakderan ti Commission on Elections (Comelec) ita a Lunes, Mayo 26, ti pammatida a ti 2025 midterm elections ti kaballigian iti historia ti panagbobotos iti Filipinas, nga impaganetgetna ti napardas, natalna ken naurnos, ken kaaduan ti nagbotos--iti baet ti kiddaw dagiti pannakabagi ti Makabayan bloc a pannakaimbestigar dagiti maipagarup nga anomalia.
Impila da Rep. Raoul Manuel (Kabataan Party-list), Rep. Arlene Brosas (Gabriela Women), ken Rep. France Castro (ACT Teachers) ti House Resolution No. 2291 nga agkidkiddaw a mangimbestigar kadagiti maipagarup nga iregularidad iti 2025 election.
Dinakamat ti resolusion dagiti report manipud kadagiti grupo ti election watchdog kas iti Kontra Daya, Vote Report PH, NAMFREL, ken Computer Professionals Union a nangiparang iti teknikal nga anomalia, voter disenfranchisement, ken isyu ti transparency.
Naidatag dagiti nadumaduma a pakaseknan kas iti diperensia iti audited ken ti actual software version ti Automated Counting Machines (ACMs), ballot paper jam, vote duplication, naperdi a machine, ken mapukpukaw a voter receipt. Dinakamat met ti resolusion dagiti maigaparup nga overvote, atiddug a pila, red-tagging, ken ti pannakausar ti kontrobersial nga election technology supplier a Miru Systems.
De Lima: Mabalin nga agpatulong dagiti House prosecutor iti SC no saan a mayallatiw iti maika-20 a Kongreso ti impeachment trial ni Sara Duterte
Iti laksid dagitoy nga alegasion, takderan latta ti Comelec ti integridad ti 2025 election ken ipaganetgetda a natungpal dagiti proseso kas maitunos iti agdama a linteg ken proseso.
Kinuna ti panakangiwat ti Comelec a ni John Rex Laudiangco a sisasagana ti Comelec a sumango iti Kongreso no maayabanda a mangiparang iti pudno a datos ken gapuanan ti kalkalpas nga eleksion, a kinunana a kapardasan iti panangi-transmit ken panangbilang kadagiti botos, ken ti kaurnosan iti historia ti pagilian.
Impaganetget ni Laudiangco a natungpal ti Comelec ti naibilin iti Republic Act No. 8436, kas inamendaran ti RA 9369, ket sisasaganada a mangipatungpal iti ania man nga ipaulog ti Kongreso iti mapasungad - agraman ti kiddaw a panagbalin iti hybrid election system. (Dhel Nazario/Manila Bulletin//Lito Hilidon/Bannawag)
