Nasaysayaat no dagiti ahensia ti gobierno ti mangberipikar iti kinasiasino dagiti napanaganan iti “Cel Diokno” ken “Marian Rivera” a maipagarup a nagparang kadagiti dokumento a mainaig iti confidential ken intelligence fund nga inruar ti Office of the Vice President (OVP).
Daytoy ti inlawlawag ni Lanao del Sur 1st district Rep. Zia Alonto Adiong idi Mayo 25, a dakdakamatenna dagiti ahensia ti gobierno a ti Philippine Statistics Authority (PSA) ken National Bureau of Investigation (NBI).
Abogado ken politiko ni Diokno, idinto nga artista ni Rivera.
Iti kallabes, nagwaras ti damag iti maipagarup a panakairaman ti naganda kadagiti mapagduaduaan nga acknowledgment receipts (AR) ti confidential funds ni Bise Presidente Sara Duterte.
De Lima: Mabalin nga agpatulong dagiti House prosecutor iti SC no saan a mayallatiw iti maika-20 a Kongreso ti impeachment trial ni Sara Duterte
Kinuna ni Adiong nagpatulongda iti PSA ken NBI tapno maberipikar dagitoy ken maammuanda no pudpudno a nagan ti tao ken no naidumada kadagiti nalatak a tao a kastoy ti naganda.
Segun ken ni Adiong, adu ti AR a saan a nairaman iti panagimbestigar ti Committee on Good Government and Public Accountability ti Kamara mainaig iti di umno a pannakausar ti confidential fund. (Ellson Quismorio/Manila Bulletin//Lito Hilidon/Bannawag)
