Dinagdag ni Presidente Ferdinand R. Marcos Jr. dagiti dadaulo ti Association of Southeast Asian Nations (ASEAN) ita nga aldaw, Mayo 26, a pardasanda koma ti mangipaulog iti addaan bileg a Code of Conduct (COC) iti South China Sea, bayat ti ikakaro ti risiris iti rehion.
Iti panagbitlana iti 46th ASEAN Summit a naangay iti Kuala Lumpur, Malaysia, inlawlawag ni Presidente Marcos a napateg ti COC iti pannakasalaknib dagiti kalintegan iti baybay, mangitandudo iti kinatalged, ken mangilisi iti panagbiddut iti taaw.
Inyawag daytoy ni Marcos gapu iti lumanlan a panagsinnaranget iti nagbaetan ti China ken dagiti pagilian iti South Asia, partikular iti Filipinas ken Vietnam, kadagiti pagsusupiatan a baybay.
Itay kallabes, dua a bapor ti Bureau of Fisheries and Aquatic Resources (BFAR) ti nadadael gapu iti panangdamgis ken panangipaturong ti water cannon ti bapor ti China Coast Guard kadakuada kabayatan ti panangisayangkatda iti marine scientific research iti Pag-asa Cay 2 (Sandy Cay) a masarakan iti lauden a paset ti Pag-asa Island iti Kalayaan Island Group.
De Lima: Mabalin nga agpatulong dagiti House prosecutor iti SC no saan a mayallatiw iti maika-20 a Kongreso ti impeachment trial ni Sara Duterte
Sangapulo a tawenen a naitantan ti bukbuklen ti China ken ASEAN a Code of Conduct, a manamnama a mangipasdek iti paglintegan ken mangilisi iti risiris kadagiti mapagsusupiatan a baybay.
Impaganetget ni Presidente Marcos a ti talna iti rehion, seguridad ken kinatalged ti rumbeng a tarigagayan ti ASEAN. (Darryl John Esguerra/PNA//Lito Hilidon/Bannawag)
