Inwaragawag ni Sekretario ti Department of Interior and Local Government (DILG) Jonvic Remulla ita a Mayo 26 nga addan napili ni Presidente Ferdinand Marcos Jr. a sumaruno a hepe ti Philippine National Police (PNP).
Iti press briefing iti Camp Karingal, Quezon City, kinuna ni Remulla a nagsaritadan ken ni Presidente Marcos ket addan napili ti presidente, ngem urayen lattan ti opisial a pannakaipakaammo iti daytoy iti mapasungad a dua a lawas.
Segun ken ni Remulla, nasayaat unay a pili, kualipikado unay, nabileg unay, addaan naimbag a track record ti agbalin a kasukat ni PNP Chief Gen. Rommel Marbil.
Inyalud-od ni Presidente Marcos ti panagakem ni Marbil iti uppat a bulan manipud iti mandatory retirement daytoy idi Pebrero 7 tapno masigurado ti natalged a 2025 midterm election.
De Lima: Mabalin nga agpatulong dagiti House prosecutor iti SC no saan a mayallatiw iti maika-20 a Kongreso ti impeachment trial ni Sara Duterte
Nairaman kadagiti pagpilpilian ni Presidente Marcos a sumaruno a hepe ti PNP da PNP Deputy Chief for Administration Lt. Gen. Jose Melencio Nartatez Jr., PNP chief directorial staff Lt. Gen. Edgar Allan Okubo, National Capital Region Police Office Director Brig. Gen. Anthony Aberin, ken Criminal Investigation and Detection Group Director Maj. Gen. Nicolas Torre III. (Christopher Lloyd Caliwan/PNA//Lito Hilidon/Bannawag)
