Tarigagayan ni Senador Ramon “Bong” Revilla Jr. ti mangipila iti kaso a cyberlibel kontra kadagiti mapapati a nagiwaras iti palso nga impormasion maipapan kenkuana idi panawen ti eleksion 2025, a patienna a makaigapu iti pannakaatiwna iti panagngayangayna manen a kas senador.
Iti maysa a press briefing ita a Lunes, Mayo 26, kinuna ni Raymond Fortun, abogado ni Revilla, a nupay naabsuelto ni Revilla idi 2018 ken 2019 iti kasona a plunder ken graft mainaig iti maipagarup a di umisu a pannakausar ti Priority Development Assistance Fund (PDAF), rimmuar dagiti makadadael a paskil iti internet a kinombiktar ti Sandiganbayan ni Revilla ken nabilin nga isublina ti ₱124.5 a milion.
Segun ken ni Fortun, maysa a kinaulbod dagiti naipaskil a panggepda a dadaelen ti naimbag a nagan ken reputasion ni Revilla, idinto nga awan ti kasona iti korte sipud iti pannakaabsueltona.
Inkeddeng ni Revilla ti mangidatag iti legal nga aksion kalpasan a nakiuman iti pamiliana, tapno madusa dagiti agusar iti digital platform a mangiwaras iti palso nga impormasion nga awan ti pakabigbiganda.
De Lima: Mabalin nga agpatulong dagiti House prosecutor iti SC no saan a mayallatiw iti maika-20 a Kongreso ti impeachment trial ni Sara Duterte
Kinuna ni Fortun a kitkitaenda pay dagiti nagan sakbay nga itedda daytoy iti National Bureau of Investigation (NBI) tapno maimbestigar, nangruna dagiti aglinglinged iti parbo a nagan.
Maika-14 ni Revilla iti resulta ti 2025 senatorial election, ket patienna a dakkel ti nagbalin nga epekto ti fake news iti naalana a botos. Kadagiti naglabas nga eleksion, adda ni Revilla iti umuna wenno maikadua a puesto iti eleksion ti kinasenador ken maika-11 idi 2019 a kangitingitan ti kasona.
Patien ni Revilla nga organisado ken nairanta daytoy a panangperdi kenkuana ngem dina kayat nga ammuen no ania a maris ti politika ti atapenna ta paset daytoy ti politika, ngem dina palabsen ti pannakausar ti fake news.
Innayon ni Revilla a nupay nairuamen iti political attack iti las-ud ti karerana, dina mabalin a palabsen ti panangallilaw iti publiko. (Dhel Nazario/Manila Bulletin//Lito Hilidon/Bannawag)
