Kiniddaw ti Department of Justice (DOJ) iti Angeles City regional trial court (RTC) a waswasenda koma ti pasaporte ni Harry Roque idinto a naipaulogen ti warrant of arrest para iti saan a mapiansaan a kasona a qualified human trafficking.
Segun ken ni Secretario ti DOJ Jesus Crispin C. Remulla, naidatagdan ti kiddawda iti RTC idi Mayo 23.
No mawaswas ti pasaportena, agbalin ni Roque a kas undocumented alien iti ballasiw-taaw ken maideportar iti Filipinas.
Naipaulog ti warrant of arrest a maibusor ken ni Roque ken dagiti dadduma pay a naidarum iti kaso a qualified human trafficking mainaig iti maipagarup a kriminal nga aktibidad ti Lucky South 99, a maysa a Philippine Offshore Gaming Operator (POGO) iti Porac, Pampanga nga inserra ti gobierno.
De Lima: Mabalin nga agpatulong dagiti House prosecutor iti SC no saan a mayallatiw iti maika-20 a Kongreso ti impeachment trial ni Sara Duterte
Ngem pimmanaw a dagus ni Roque iti pagilian sakbay pay a maipila ti kasona iti korte, ken nagkamang ita iti The Netherlands tapno agkiddaw ti asylum sadiay.
Nupay kasta, kinuna ni Remulla a dina namnamaen a patgan ti The Netherlands ti kiddaw ni Roque nga asylum agsipud ta maysa ti Netherlands kadagiti pagilian a kagurada ti human trafficking. (Jeffrey Damicog/Manila Bulletin//Lito Hilidon/Bannawag)
