Napaliiw ti Metropolitan Manila Development Authority (MMDA) ti disiplina dagiti motorista a lumablabas kadagiti kangrunaan a kalsada ti Kamanilaan bayat ti pannakaipatungpal ti No-Contact Apprehension Policy (NCAP) idi Lunes, Mayo 26.
Nupay nabang-aran ti dadduma a netizen ken nagyamanda iti kellaat a pannakadisplina dagiti motorista iti kalsada, nagriri ti sumagmamano a rider gapu iti pannakalakonda iti motorcyle lane ken saandan a makasingit iti baet dagiti lugan no kasta a trapik.
Impaskil ti MMDA dagiti video ken ladawan dagiti natudio a motorista a lumablabas iti Commonwealth Avenue iti Quezon City ita nga agsapa ti Martes, Mayo 27, ti maikadua nga aldaw ti pannakaipatungpal ti NCAP iti Metro Manila.
Nupay kasta, kinuna ti chief information officer ti MMDA a ni Sharon Gentalian a nasapa unay nga ideklarar ti panagbaliw ti kadawyan dagiti motorista idinto a dua nga aldaw pay laeng a naipatungpal ti NCAP.
De Lima: Mabalin nga agpatulong dagiti House prosecutor iti SC no saan a mayallatiw iti maika-20 a Kongreso ti impeachment trial ni Sara Duterte
Segun iti datos ti MMDA, agdagup iti 1,112 ti naglabsing a nailanad iti NCAP iti umuna nga aldaw a naipatungpal daytoy, a kaaduan a panaglabsing ti iseserrek iti bus lane, panagmaneho iti motorcycle lane, ken illegal a panangisakay ken panangibaba kadagiti pasahero.
Kinuna ni Victor Nuñez, direktor ti MMDA Traffic Enforcement Group, a nababbaba daytoy iti 50 a porsiento no idilig iti bilang idi napan a lawas nga adda 3,900 a naglabsing a tiniliw dagiti autoridad.
Naipatungpal manen ti NCAP idi Lunes kalpasan a winaswas ti Korte Suprema ti temporary restraining order nga impaulogna idi 2022, maibatay iti petision nga indatag dagiti grupo ti transportasion a nangkuestionar iti legalidad ti pannakaipatungpal daytoy.
Malaksid iti EDSA, maipakat ti NCAP kadagiti dadduma pay a kalsada kas iti Recto, Mendoza, Quirino Avenue, Araneta Avenue, CP Garcia, Katipunan Avenue, Tandang Sora, Roxas Boulevard, Taft Avenue, South Superhighway, ken Shaw Boulevard.
Maipatungpal met it NCAP iti Ortigas Avenue, Magsaysay Boulevard, Aurora Boulevard, Quezon Avenue, Commonwealth Avenue, A. Bonifacio, Rizal Avenue, Delpan, Marcos Highway, ken MacArthur Highway. (Aaron Recuenco/Manila Bulletin//Lito Hilidon/Bannawag)
