Impanamnama ni Sekretario ti Department of Migrant Workers (DMW) Hans Leo Cacdac a maidatag kadagiti kaso a kriminal ken administratibo kontra kadagiti nairaman iti mapapati a naanomalia a transaksion ti pananggatang iti daga nga aggatad iti ₱1.4 a nakaikkatan ni Arnell Ignacio kas administrador ti Overseas Workers Welfare Administration (OWWA).
Segun ken ni Cacdac, natakuatanda kalpasan ti panagimbestigar ti di pannakatagikua ti OWWA iti nasao a ginatangda a daga uray no nabayadanen.
Kangrunaan a parikut ti transparensia agsipud ta awan dagiti katulagan ken kontrata a saan a sibubukel a naiparang kadagiti Board of Trustees ti OWWA nga idadauluan ni Cacdac.
Kinuna ni Cacdac a maidatag ti umisu nga administratibo ken kriminal a kaso kontra kadagiti maseknan nga opisial ti OWWA a nakipaset iti nariro a transaksion.
Defense panel ti rumbeng a mangipila iti pannakawaswas ti impeachment --Lacson
Iti kallabes, adda waragawag a naglusulos ni Ignacio a kas administrador ti OWWA, ngem imbutaktak ni Cacdac a saan a panaglusulos ti naaramid no di ket pannakaikkat iti takem ni Ignacio gapu iti pannakapukaw ti panagtalek.
Inlawlawag ni Cacdac a nagbiddut ti OWWA iti inaramidda, ta pinagbalinda ti ₱2.6-bilion nga emergency repatriation funds a kas capital outlay fund, a saan nga inaprobaran ti Board of Trustees ti OWWA. (Aaron Recuenco/Manila Bulletin//Lito Hilidon/Bannawag)
