Padasen ti Philippine Marine Corps (PMC) ken United States Marine Corps (USMC) ti Navy-Marine Expeditionary Ship Interdiction System (NMESIS), maysa nga anti-ship missile system a naaramid iti Amerika, iti maangay a Kamandag Exercise inton umay a lawas.
Ti Kamandag, wenno “Kaagapay ng mga Mandirigma Mula sa Dagat,” ti tinawen a panagsanay dagiti kameng ti PMC ken USMC tapno mapasayaat ti interoperability ken panagsagana iti panangdepensa iti teritorio, kangrunaan iti baybay iti Indo-Pacific region.
Agarup 4,000 a kameng ti PMC ken USMC ti sangsangkamaysa nga agsanay iti nadumaduma a lugar a sakup ti Northern Luzon Command (Nolcom), ti Western Command (Wescom), ti Western Mindanao Command (Westmincom), agraman kadagiti napili a lugar iti Cavite ken Manila.
Segun iti panakangiwat ti Philippine Navy a ni Captain John Percie Alcos, iti waragawagna ita a Mayo 27, mausar ti NMESIS iti maysa a panagsanay iti maritime strike inton Hunio 1 iti Burgos, Ilocos Norte.
Ti impeachment trial ti mangdalus iti naganko --Sara Duterte
Kinuna ni Alcos a maaramid daytoy tapno masursuruan dagiti PMC a mangusar iti NMESIS modernisasion daytoy.
Makipaset iti Kamandag Exercise dagiti puersa ti Japan, South Korea, ken Britain a danggayan met dagiti agobserbar nga aggapu iti Australia, Bahrain, Canada, France, Indonesia, Netherlands, New Zealand, ken Thailand. (Martin Sadongdong/Manila Bulletin//Lito Hilidon/Bannawag)
