Dinagadag ni Presidente Ferdinand Marcos Jr. kadagiti kagrupo ti Filipinas ti Association of Southeast Asian Nations (ASEAN) a nayonanda ti pondo para iti climate change tapno mabaelan ti rehion a magun-od dagiti panggep a mangsaranget iti epekto ti panagbalbaliw ti klima.
Iti panagsaritana iti plenario ti 46th ASEAN Summit idi Mayo 26, pinasingkedan ni Marcos ti panagkumit ti Filipinas a mangitandudo iti nainsientipikuan ken maibatay iti ebidensia a solusion iti climate change, ket impaganetgetna a daytoy ti kadakkelan a karit itoy a panawen.
Kiniddaw ni Marcos ti naun-uneg a panagtitinnulong dagiti pagilian iti rehion, a masansan nga apektaran ti climate change.
Dimmar-ay ni Marcos iti 46th ASEAN Summit a maang-angay iti Kuala Lumpur, Malaysia a kaduana da DTI Secretary Ma. Cristina Aldeguer-Roque, PCO Secretary Jay Ruiz (PCO), ken ti daulo ti Mindanao Development Authority a ni Leo Tereso Magno. (Betheena Unite/Manila Bulletin//Lito Hilidon/Bannawag)
