Agusar ti amin a korte iti pagilian iti voice-to-text transcription platform a patarayen ti Artificial intelligence (AI) iti las-ud ti makatawen a pilot test iti entero a pagilian.
Segun ken ni Chief Justice ti Supreme Court (SC) Alexander G. Gesmundo, rinugianen ti SC ti gumatang iti lisensia para iti pannakaipatungpal ti AI transcription platform iti amin a nibel ti hudikatura.
Iti naangay a rehional a kombension ti Court Stenographers Association of the Philippines (COSTRAPHIL) iti Siudad ti Tagaytay, kinuna ni Gesmundo a naaramid ti pilot test ti AI-powered voice-to-text transcription iti Sandiganbayan ken kadagiti 41 a city ken municipal court, ken regional trial court iti entero a pagilian.
Segun ken ni Gesmundo, babaen ti Scriptix, ti AI-powered voice-to-text transcription platform, 50 a porsiento ti naksay iti oras ti panangi-transcribe dagiti korte a nakipaset iti pilot test idinto a 80 a porsiento ti naksay kadagiti dadduma.
De Lima: Mabalin nga agpatulong dagiti House prosecutor iti SC no saan a mayallatiw iti maika-20 a Kongreso ti impeachment trial ni Sara Duterte
Daytoy ti mangpapardas iti panangi-transcribe dagiti korte ken mangkissay iti oras dagiti empleado tapno ad-adu ti mailatangda nga oras kadagiti trabaho a mainaig iti korte.
Nupay addan mausar a trancription platform, kinuna ni Gesmundo a napateg latta dagiti stenographer ti korte iti modernisasion ti hudikatura, uray agbalinen a digital ti transcription. Innayonna a saan a sukatan ti AI transcription platform dagiti stenographer, ngem dakkel a katulongan daytoy iti trabahoda.
Impaganetget ni Gesmundo a babaen ti panangisayangkatda iti panagsanay dagiti stenographer iti maang-angay a kombension ti COSTRAPHIL, maan-anay ken manayonan ti kinasigo ken pannakaammo dagiti stenographer ti korte. (Rey G. Panaligan/Manila Bulletin//Lito Hilidon/Bannawag)
