Naipasungalngal iti agdama ti Filipinas iti kritikal a panagkurang ti siled a pagadalan, a nanggapuanna a namallaag ti Department of Education (DepEd) nga umabot pay iti 30 a tawen ti pannakasolbar daytoy a parikut no saan a maikadakkel ti pondo para itoy.
Iti agdama a badiet, kinuna ni DepEd Secretary Sonny Angara a tapno makaaramid iti umdas a classroom para kadagiti estudiante iti public school, abotenna ti adu a dekada.
Impaganetget Angara idi Lunes, Mayo 26, ti nadaras a panagkasapulan iti dakdakkel a panagpuonan iti impraestruktura ti publiko nga edukasion iti pagilian a dinakamatana ti kinakirang ti siled a pagadalan.
“Agarup 165,000 ti kurang a classroom ket dumakdakkel pay ti panagkasapulan ta saana kabaelan ti agdama a badiet--kasapulantayo ti 30 a tawen tapno mangbangon no ti laeng usarentayo ket ti agdama a badiet,” kinuna ni Angara iti maysa nga interbiu bayat ti pannakayalnag ti Generation HOPe iti SM Aura Premier iti Bonifacio Global City, Taguig.
Torre, baro a hepe ti PNP
Segun iti datos ti DepEd, agkurang ti Filipinas iti aganay a 165,443 a classroom--maysa a karit a direkta a mangapektar iti kalidad ti edukasion ken masakbayan dagiti agtutubo a Filipino.
Tapno mataming daytoy a kasapulan, nakikadua ti DepEd iti HOPE ken ti koalision dagiti kangrunaan a brand a mangirugi iti Generation HOPE--maysa nga innovative campaign a nairanta a mangpabileg kadagiti consumer tapno suportaranda ti edukasion ken nation-building babaen ti napateg a marketing initiatives. (Merlina Hernando-Malipot/MB)
