Agannad iti panamatpati la unay kadagiti survey.
Daytoy ti imbaga ni House of Representatives spokesperson Princess Abante kas reaksion iti nabiit pay a nairuar a resulta ti survey ti Pulse Asia a 50 a porsiento kadagiti Filipino ti mangkontra iti pannakaipila ti impeachment case ken ni Bise Presidente Sara Duterte.
Iti maysa nga interview idi Martes, Mayo 27, dinakamat ni Abante ti posibilidad a saan a pannakaitunos ti resulta ti survey iti pudpudno a pulso dagiti Filipino.
Dinakamat ti abogada a kas pagarigan ti popularity polls kadagiti "senatoriable" sakbay ti May 12 mid-term elections. Impakita ti resulta ti aktual nga eleksion nga adu kadagiti naiwayat a survey ti nagkamtud.
Torre, baro a hepe ti PNP
"Nalabit, no adda nasursurotayo iti daytoy nga eleksion, isu ti di pannakaitunos dagiti datos ti survey sakbay ti eleksion kadagiti aktual a resulta," kinunana.
"Nakitatayo nga adda dagiti kandidato a kanayon a naiparang a mangabak kadagiti survey iti entero a panawen ti kampania ngem saanda met a nagballigi," innayonna.
Kinuna ni Abante nga adda dagiti "sorpresa a nangabak" iti eleksion a saan a nairamraman kadagiti manamnama a mangabak segun kadagiti survey.
"Masapul a maawatantayo saan la a no kasano ti marikna dagiti tattao maibatay kadagiti survey, ngem ketdi, masapul a direkta a mapantayo kadakuada tapno a maamiristayo dagiti pudpudno a kasapulanda," kinunana pay.
In-impeach ti House of Representatives ni Bise Presidente Duterte idi Pebrero 5, 2025 babaen ti puersa ti 215 a kongresman a nagpirma. Isu ti kaunaan a bise presidente a na-impeach, iti pakasaritaan ti pagilian.
Dagiti sumaganad dagiti pito nga articles of impeachment kontra ken ni Duterte:
Artikulo 1: Conspiracy a panangpapatay kada Presidente Marcos, First Lady Liza Araneta-Marcos, ken Speaker Martin Romualdez;
Artikulo 2: Malversation ti ₱612.5 a milion a kompidensial a pondo;
Artikulo 3: Panagpasuksok ken panagkunniber iti Department of Education (DepEd);
Artikulo 4: Di mailawlawag a kinabaknang ken saan a panangipalgak kadagiti sanikua;
Artikulo 5: Pannakipaset kadagiti ekstrahudisial a pammapatay (EJK);
Artikulo 6: Destabilisasion, insureksion, ken panangriribuk iti publiko; ken
Artikulo 7: Ti pakabuklan ti tignay ti respondent a kas Bise Presidente. (Ellson Quismorio/MANILA BULLETIN)
