Tinakderan ni Presidente Ferdinand Marcos Jr. idi Mayo 27 a dina inanamongan ti impeachment ni Bise Presidente Sara Duterte, idinto a sinupiatna dagiti kakadua ti bise presidente Duterte a nangituding kadagiti kondision ti pannakikappia wenno rekonsiliasion.
Iti pannakisaritana kadagiti reporter kalpasan ti 46th Association of Southeast Asian Nations (ASEAN) Summit iti Kuala Lumpur, Malaysia, impaganetget ti presidente a saanna nga insayangkat wenno sinuportaran ti impeachment complaint nga adda itan iti Senado.
Kinuna ni Marcos a saanna a madiktaran wenno malapdan dagiti nangidatag iti impeachment complaint, idinto a binigbigna a ti Kamara ken Senado ti makaammo a mangtaming iti kaso.
Iti sabali a bangir, sinupiat ni Marcos ti singasing dagiti kakadua ti kampo ti Duterte nga adda kondision iti pannakikappia, kalpasan nga imbaga da Senador Bong Go ken dadduma pay a kakadua ni Duterte a masapul nga isublida iti pagilian ni dati a presidente Rodrigo Duterte manipud iti International Criminal Court (ICC)--sakbay a pagsasaritaanda ti panagkakappia.
Ti impeachment trial ti mangdalus iti naganko --Sara Duterte
Segun ken ni Marcos, saan a mabalin nga adda kondision iti reconciliation.
Kinunana a no napudno ti panggepda a makikappia, masapul a pagsasaritaanda ti parikut, ket saanda nga usaren dagiti kondision a pangibatayan iti politikal a panagsasarita.
Innayon ni Marcos a napudno ken awan ti kondision ti indiayana a reconciliation. (Argyll Cyrus Geducos/Manila Bulletin//Lito Hilidon/Bannawag)
