Kinuna ni Armed Forces of the Philippines (AFP) Chief General Romeo Brawner Jr. ita nga aldaw, Mayo 28, a saan a pudno dagiti sayangguseng nga adda dagiti agpanggep nga agkudeta tapno maikkat ni Presidente Marcos Jr., ket impaganetgetna a saan a mapasamak daytoy agingga nga isu ti mangituray kadagiti soldado.
Iti maysa nga statement, pinasingkedan ni Brawner ti di aglumen a pangkumit ti militar iti Konstitusion ken iti chain of command.
Kinuna ni Brawner nga awan ti mapasamak a kudeta agingga nga isu ti Chief of Staff, idinto a saan a paapektaran dagiti militar kadagiti sayangguseng ken riribuk.
Nagwaras manen ti sayangguseng, nangruna iti social media, nga adda panagsusupiat iti uneg ti militar kalpasan ti pannakaarestar ni dati a presidente Rodrigo Duterte ken iti pannakausigna iti International Criminal Court (ICC) iti The Hague, Netherlands.
Pagalagadan iti MAIFIP mainaig iti pannakaiparit ti guarantee letter, iruar ti DOH inton Pebrero
Idi Enero nga agsagsagana ti militar para iti eleksion, kinuna ni Brawner a saan a military junta ti mangrisut kadagiti parikut ti pagilian kas sungbat iti panangallukoy ni Duterte iti AFP nga aturenda ti "naperdi a panagturay" ni Marcos.
Ita a nalpas ti eleksion, napataud manen ti sayangguseng gapu iti resulta ti midterm elections, gapu ta ad-adu ti nangabak senador a kakadua ni Duterte ngem kadagiti kakadua ti Marcos administration.
Iti sabali a bangir, binallaagan ni Brawner dagiti mangpatpataud iti panagsisina ken palso nga impormasion mainaig iti maipagarup a kudeta, ta dagitoy ti mangilumlom iti institusion a naipasdek tapno agserbi ken mangsalaknib kadagiti umili. (Martin Sadongdong/Manila Bulletin//Lito Hilidon/Bannawag)
