Inawat ni dati a Solicitor General Menardo I. Guevarra ti pangngeddeng ni Presidente Marcos a dina panagtalinaed a kas daulo ti Office of the Solicitor General (OSG).
Ni Darlene Marie B. Berberabe ti dinutokan ni Presidente Marcos a kas solicitor general, ita nga aldaw, Mayo 29.
Ni Berberabe ti dekana ti University of the Philippines College of Law ken lecturer iti Philippine Judicial Academy, ti education arm ti Korte Suprema.
Iti maysa nga statement, kinuna ni Guevarra a raemen ken maawatanna ti desision ti presidente, ket kinablaawanna ni Berberabe, a kinunana a maysa a "top-caliber" nga abogado daytoy.
Nagpaay ni Guevarra a kas justice secretary idi panawen ni dati a presidente Rodrigo Duterte. (Jeffrey Damicog/Manila Bulletin//Lito Hilidon/Bannawag)
