Nagtulag ti Filipinas ken Japan nga agtinnulongda, nga iramanda ti Estados Unidos tapno matungpal ti siwawaya ken silulukat nga Indo-Pacific region kas maibatay iti linteg, segun iti Ministry of Foreign Affairs (MOFA) ti Japan.
Iti statement ti MOFA a naipaskil idi Mayo 28, inwaragawagda ti naangay a Japan-Philippines Foreign Ministers' Meeting ken Working Lunch iti nagbaetan da Department of Foreign Affairs (DFA) Secretary Enrique Manalo ken Japanese Foreign Minister Takeshi Iwaya.
Iti nasao a taripnong, inanamongan dagiti dua nga opisial ti kinapateg ti agtultuloy a pannakipaset ti Estados Unidos kadagiti nadumaduma a parikut ti Indo-Pacific region, agraman dagiti bambanag a pakaseknan ti rehion, kas iti East China Sea (ECS) ken iti South China Sea (SCS).
Malaksid iti supiat kadagiti teritorio ti ECS ken SCS pinagsaritaan pay dagiti dua nga opisial dagiti parikut iti Myanmar ken iti Middle East, agraman ti panangsakup ti Russia iti Ukraine, nuclear program ti North Korea, ken ti taripa nga intuding ti Estados Unidos nga addaan dakkel nga epekto iti ekonomia ti sangalubongan. (Raymund Antonio/Manila Bulletin//Lito Hilidon/Bannawag)
