Naisa ti higante a bandera ti Filipinas iti pannakalukat ti Palarong Pambansa ita a tawen idi Mayo 24 iti Siudad ti laoag, ket sipapadayaw dagiti mangngabel ken agdadait a nangaramid iti bandera a nangipannakkel ti obrada.
Nagtitinnulong dagiti sangapulo ket innem a mangngabel ken agdadait manipud iti lima nga ili ti Ilocos Norte a nangabel ken nangdait iti bandera nga agrukod iti 10x20 a kadapan ken naaramid iti inabel, maysa a naidumduma nga Ilokano a tela.
"Inaramidmi ti pasetna a puraw. Adda rigrigatna ngem babaen ti pammarabur ti Dios, inaramidmi," kinuna ni Daiana Tugaoen, mangngabel manipud iti ili ti Banna.
Kaduana dagiti mangngabel manipud iti ili ti Paoay, Sarrat, ken Pinili, ken dagiti dumadait manipud iti Piddig, kinuna ni Tugaoen nga agyamyamanda iti gobierno probinsial ken kadagiti lokal nga opisial iti panangitalekda iti nasao a proyekto kadakuada.
Ili ti Aritao, kampeon iti Street Dancing Competition ti Grand Ammungan Festival 2025
"Maysa a dayaw ti agbalin a paset ti nakallalagip a pagteng. Pudpudno a maysa nga obra ti ayat," kinuna ti Nagbacalan Loomweavers ti Paoay, a nairaman met iti proyekto.
Tapno mapadur-as ti nabayagen nga industria iti probinsia, mayam-ammo itan dagiti baro a moderno a pattern ken disenio para iti inabel nga Ilokano tapno ad-adu pay ti maallukoy a kustomer ken agdisdisenio, partikular dagiti naub-ubbing a henerasion.
Nadumaduma a yunit ti lokal a gobierno iti probinsia, kas iti Banna ken Vintar, ti nangadaptar iti sumagmamano kadagiti naisangsangayan a pattern tapno mapapigsada ti industria ti inabel, idinto nga inyam-ammo dagiti dadduma a homegrown startups dagiti baro a wagas tapno mapasayaat dagiti produkto, saan la a dagiti ules ken arpaw ti lamisaan no di pati dagiti fashion clothes ken accessories a makaawis kadagiti naub-ubing a henerasion.
Supsuportaran ti gobierno ti Ilocos Norte ken dagiti nadumaduma nga ahensia ti gobierno daytoy nga addang babaen ti sumagmamano nga inisiatiba kas iti pannakaipaay dagiti material ken oportunidad ti pagbiagan para iti pannakausar ti panagabel kas napateg nga aramid tapno maitandudo ti kultura ken kinasiasino dagiti Ilokano. (Leilanie Adriano/PNA)
