Addan napili ni Presidente Ferdinand Marcos Jr. a sumaruno a hepe ti Philippine National Police (PNP). PInasingkedanna daytoy iti maysa nga interbiu kenkuana iti maika-46 nga Association of Southeast Asian Nations (ASEAN) Summit iti Kuala Lumpur, Malaysia, idi malem ti Martes, Mayo 27.
Nupay kinompirmarna a napilinan ti baro a PNP Chief, nagkedked a mangipalgak iti nagan daytoy, a kunana a rumbeng a maammuan pay nga umuna ti napili nga opisial manipud kenkuana a mismo, a saan a babaen ti damagdamag laeng.
Idinto a dina pay impalgak ti kinasiasino ti napilina, dineskribir ti presidente ti sumaruno a hepe ti PNP a kas maysa a senior officer a siguden a pamiliar iti tay-ak ti law enforcement iti pagilian.
Naitantantan ti pannakapili ti sumaruno a hepe ti PNP kalpasan ti pannakapaatiddog ti termino ti agdama a hepe ti PNP a ni Police Gen. Rommel Francisco Marbil, a nagretiro koma idi pay Pebrero 7 ngem inyalud-od ni Marcos iti uppat a bulan tapno masigurado ti "leadership stability iti ikub ti PNP bayat ti kritikal a panawen ti eleksion." (Argyll Cyrus Geducos/MANILA BULLETIN)
