Sisasagana ti Philippine National Police (PNP) a mangipaay iti pagdagusan ni dati a kongresman ti Negros Oriental 3rd District Arnie Teves no mapaawid iti Filipinas kalpasan a makemmeg iti Timor-Leste idi Mayo 28.
Kinuna ni hepe ti PNP Gen. Rommel Francisco Marbil nga awan pay ti naawatda a pakaammo manipud iti Department of Justice (DOJ) mainaig iti kasasaad ni Teves a maysa a "wanted" gapu iti pannakapapatay ni dati a gobernador ti Negros Oriental Roel Degamo idi Marso 2023.
Nupay kasta, kinuna ni Marbil a sisasagana ti PNP a mangipaay iti pasilidad kas iti Custodial Center iti Camp Crame, Quezon City a nakaipupokan idi ni dati a senadora Leila de Lima a naabsuelto itan kadagiti kasona mainaig iti droga.
Segun ken ni Marbil, saanda pay nga ammo no ania ti plano ti DOJ, ngem sisasaganada a tumulong no kasapulan.
Uppat a kompania ti lugan a nairaman iti aksidente, pinaayaban ti LTFRB
Dagiti polis ken kameng ti immigration ti Timor-Leste ti nangkemmeg ken ni Teves a pagkikiddawanna iti asylum kalpasan a rimmuar ti warrant of arrest gapu iti maipagarup a pannakairamanna iti pannakapapatay ni Degamo. (Aaron Recuenco/Manila Bulletin//Lito Hilidon/Bannawag)
