Sumagmamano nga aldaw sakbay a marugian ti impeachment trial ni Bise Presidente Sara Duterte iti Senado, imbutaktak ni La Union 1st district Rep. Paolo Ortega ti maipagarup a palso a nagan dagiti immawat ti confidential fund ti Office of the Vice President (OVP), ket pito kadakuada ti agparparang a nangusar iti nagan ti sumagmamano a senador.
Nairaman iti acknowledgement receipt (AR) dagiti nagnagan a “Beth Revilla," “Janice Marie Revilla," "Diane Maple Lapid," “John A. Lapid Jr.," “Clarisse Hontiveros," “Kristine Applegate Estrada," ken “Denise Tanya Escudero.”
Kaapeliedo dagitoy dagiti senador nga agpaay a kas ukom iti impeachment trial ni Duterte a naakusaran iti di umisu a pannakausar ti ₱612.5 a milion a gatad ti confidential fund.
Segun ken ni Ortega ita nga aldaw, Mayo 29, nabatad dagitoy nga iregularidad, a di mailibak, dagiti mapagduduaan a listaan ti immawat iti confidential fund.
Ti impeachment trial ti mangdalus iti naganko --Sara Duterte
Maipalagip a naduktalan ti Kamara ti nagan a "Mary Grace Piattos" idi napan a tawen, ket nagbalin a dakkel a pakaseknan dagiti kongresman a mangim-imbestigar no umisu met laeng ti panangusar ni Duterte iti confidential fund ti OVP.
Kinuna ni Ortega a no maulit-ulit ti panagusar ti OVP kadagiti palso a nagan, rumbeng laeng nga ilawlawag ni Duterte nga adda pudpudno a tao iti likud dagitoy a nagnagan, ta no awan, ti mismo a listaan ti agbalin nga ebidensia iti panagkunniber iti Senado.
Innayon ni Ortega a saanen a makuna a nairanrana laeng ti panagusar kadagiti bogus a nagan ta maulit-uliten ken nagbalinen a sistematiko dagitoy. (Ellson Quismorio/Manila Bulletin//Lito Hilidon/Bannawag)
