Indatag ti Judicial and Bar Council (JBC) ken ni Presidente Ferdinand Marcos Jr. ita nga aldaw, Mayo 30, ti 12 a kandidato a mabalin a mangsukat ken ni Associate Justice ti Korte Suprema (SC) Mario V. Lopez nga agretiro inton Hunio 4.
Asino man ti madutokan, daytoy ti umuna nga appointee ti Presidente iti SC, ti kangatuan a pangukoman ti pagilian, a pagkamengan ti 15 nga ukom.
Nainominar da Court of Appeals Associate Justice Nina Geluz Antonio-Valenzuela, CA Associate Justice Ramon M. Bato Jr., UP Law Dean Darlene Marie Basco Berberabe (ngem nadutokanen a baro a Solicitor General) CA Associate Justice Ramon A. Cruz, CA Associate Justice Maria Elisa Sempio Diy, CA Associate Justice Myra V. Garcia-Fernandez, CA Presiding Justice Fernanda Lampas Peralta, CA Associate Justice Ronaldo Roberto B. Martin, Sandiganbayan Associate Justice Karl B. Miranda, CA Associate Justic Walter S. Ong, Court of Tax Appeals Associate Maria Rowena M. San Pedro, ken SC Court Administrator Raul B. Villanueva.
Segun iti Konstitusion, maikkan ti Presidente iti 90 nga aldaw manipud iti aldaw a pannakabakante ti pagsaadan iti hudikatura, a mangdutok iti kasukat.
Visa-free entry dagiti Filipino a sumrek iti Taiwan, nayalud-od agingga iti 2026
Ti JBC ti mangawat, mangtingiting, manginominar kadagiti madutokan iti hudikatura, Office of the Ombudsman agraman dagiti deputy ken special prosecutor, ken dagiti kameng ti Legal Education Board. (Rey G. Panaligan/Manila Bulletin//Lito Hilidon/Bannawag)
