Inkalikagum ti maysa ng abogado a kongresman iti Kamara ti pannakadusa iti pannakabalud iti agingga iti 12 a tawen ken multa nga agingga iti ₱2 a milion kadagiti agiwaras iti fake news, nangruna iti palso nga impormasion a mamagpeggad iti public order wenno nailian a seguridad.
Impila ni Cagayan de Oro City 2nd District Rep. Rufus Rodriguez, para itoy a panggep, ti House Bill (HB) No.11506, a napauluan iti "An Act penalizing the malicious and deliberate dissemination of false information that undermines public order or national security, strengthening regulations on fake news through digital platforms, and for other purposes."
Iti gakatna, kinuna ni Rodriguez a ti karbengan iti wayawaya ti panagsao, ti panagyebkas, ken ti prensa, a garantisado babaen ti Seksion 4, Artikulo III ti Batay-linteg, "ket maysa nga adigi ti demokratiko a panagturay."
"Nupay kasta, kas impaganetget ti Korte Suprema iti Chavez v. Gonzales (2008), daytoy a karbengan ket saan nga absoluto. Adda dagiti sumagmamano a kategoria ti panagsao--a kas ti obscenity, defamation, panangsugsog iti kinaranggas, palso a panaganunsio, ken panagsao a mangpataud ti nalawag ken agdama a peggad iti kinaurnos ti publiko wenno nailian a seguridad--ket saan a maikari iti konstitusional a proteksion," kinuna ni Rodriguez.
Walo nga oras a panagtrabaho dagiti polis, panggep nga ipatungpal ni Gen. Torre
Segun pay iti gakat, ti fake news ket mangdakdakamat iti palso wenno mangallilaw nga impormasion a maiparang a kas kinapudno wenno damdamag, a nairanta ken mangpadakes ti panggepna a maiwaras tapno maallilaw ti publiko, a mabalin a mangigapu iti pannakatikaw, mangsugsog iti gura wenno kinaranggas, wenno mangsinga iti kinaurnos ti publiko.
Kabayatanna, depinaren met ti nasao a gakat ti disimpormasion a kas inuulbod nga impormasion a nairanta a maiwaras tapno mangallilaw, mangmanipular, wenno mangimpluensia iti panangmatmat, kababalin, wenno pagalagadan ti publiko.
Dagiti sumaganad dagiti naibinsa iti HB No.11506 a maiparit nga aramid:
A. Siaammmo ken mangpadakes ti panggepna a panangipablaak wenno panangiwaras babaen ti ania man a medium a pakairamanan ti print, broadcast, wenno digital ken social media, iti ania man a fake news wenno disinpormasion kas nadepinar;
B. Panangaramid, panangpataray, wenno panangpinansia kadagiti troll farm, bot network, wenno dagiti koordinado a panangikampania nga espesipiko a nairanta a mangisaknap kadagiti fake news;
C. Panangiwaras kadagiti fake news wenno disimpormasion a mangsugsog iti kinaranggas, mangitandudo iti panangisao iti panaggura, mangdiskredito kadagiti demokratiko nga institusion, wenno mabalin a mangpataud iti panagbuteng wenno riribuk iti publiko; ken
D. Panangimaton wenno panangipalubos iti pannakausar dagiti social media platform wenno accounts tapno maulit-ulit ken sistematiko a makipaset iti pannakaiwayat dagiti naagapad iti ngato.
Asino man a mapaneknekan a nakabasol a nakaaramid iti ania man kadagiti nadakamat a maiparit nga aramid ket maduda iti pannakaibalud iti 6 agingga iti 12 a tawen ken mamulta iti ₱500,000 agingga iti ₱2 a milion.
Isingasing pay ti gakat ti pannakabukel ti joint congressional oversight committee, a pakairamanan dagiti pannakabagi manipud iti civil society ken media organizations, tapno mamonitor ti pannakaipatungpal ti naisingasing a linteg.
Kinuna ni Rodriguez a kadagiti naglabas pay a tawen, ti panagsaknap ti fake news, partikular babaen kadagiti digital platform ken artificial intelligence, ket rimsua kas nakaro a pangta iti panagtalek ti publiko, demokratiko nga institusion, ken kinatalged ti pagilian.
Napaliiw ti dati a law dean a dagiti agdama a linteg, a a pakairamanan ti Revised Penal Code (RPC) ken Republic Act (RA) No. 10175 wenno ti Cybercrime Prevention Act, ket saan nga umdas a mangtaming iti agbaliwbaliw a langa ken epekto dagiti malicious disinformation campaign.
"Dagitoy a kinaulbod, a masansan a maiwaras babaen ti social media wenno sintetiko a linaon a kas kadagiti deepfake, ket addaan iti bileg a mangsugsog iti pannakatikaw, mangmanipular iti pannakaawat ti publiko, ken mangprobokar iti sibil a riribuk," kinuna ti daulo ti House Committee on Constitutional Amendments.
Kinunana a ti gakatna ket "agpanggep a mangsungbat kadagitoy a karit babaen ti panamagbalin a kas krimen iti inggagara ken mangpadakes a panggep a panagpartuat wenno panagiwaras kadagiti palso wenno mangallilaw nga impormasion a naiparang a kas kinapudno a mangpataud wenno mabalin a makapataud iti pannakadangran ti publiko." (Ellson Quismorio/MANILA BULLETIN)
